"Paxtakor" futbol klubi Superliga 4-tur o‘yiniga chiptalar sotuvi boshlanganini e’lon qiladi.

Yaqinlashib kelayotgan turda "Paxtakor" o‘z maydonida Superliganing markaziy to‘qnashuvlaridan birida "Navbahor"ni qabul qiladi va ushbu o‘yin uchun chiptalar sotuvi boshlandi.

Qiziqarli bellashuvni "Paxtakor" stadionidan kuzatishni istagan muxlislar chiptalarni Iticket.uz kassalaridan va onlayn tarzda ushbu operator saytidan xarid qilishlari mumkin. Chiptalar onlayn sotib olinganda ularni qog‘ozga chop etish shart emas, chiptaning elektron variantini stadionga kirish eshigida elektron qurilmada (telefon, planshet) ko‘rsatish kifoya. "Paxtakor" stadionidagi kassalar esa o‘yin kuni faoliyat ko‘rsatadi. O‘yin 1 aprel kuni soat 19:00'da boshlanadi. Chipta narxlari oddiy sektorlar uchun 30 ming so‘m, CIP sektorlar uchun 100 ming so‘m qilib belgilangan.

"Navbahor" ishqibozlariga chiptalarni mehmonlar muxlislari uchun mo‘ljallangan 17-23 sektorlarga xarid qilish tavsiya etiladi.

Superligada dastlabki uch turdan keyin "Paxtakor" va "Navbahor" 7 tadan ochko to‘plagan holda turnir jadvali yuqori pog‘onasida borishmoqda. Ishqibozlarni "Paxtakor"dagi ajoyib bahsga taklif etamiz", - deyiladi "sherlar" matbuot xizmati xabarida.