Garet Sautgeyt Angliya terma jamoasiga kerak bo‘lgan futbolchilarni jalb etdi. Uning tarkibida ko‘plab yulduzlar yig‘ilgan. Tanlov imkoniyati juda keng, xususan, qanot himoyasida ham. Chap qanotga Trent Aleksander-Arnold asosiy o‘rinda qaraladi. «Aston Villa» futbolchisi Metti Kesh Angliyada yettinchi yoki sakkizinchi o‘rinda turadi. Shu sabab u Polsha termasiga yo‘l oldi.
Trent
Haqiqatdan ham Trent nafaqat Angliyaning yoki Yevropaning, balki dunyoning ham o‘z pozisiyasidagi eng qimmat futbolchisidir. «Liverpul» o‘yinchisi Yurgen Klopp jamoasida haqiqiy assist mashinasiga aylanib ulgurgan. Uning kreativ va aniq paslarini muxlislar allaqachon yaxshi tanishadi. Qolaversa, u burchak to‘plari borasida «mutaxassis»ga aylangan.
Ashraf Hakimiy
Marokashlik superyulduz Aleksander-Arnold kabi yosh va navqiron. 23 bahorni qarshi olgan futbolchi hozirga qadar «Real», «Borussiya Dortmund», «Inter» hamda «PSJ» tarkibida ko‘rinish bergan. Uning futboldagi mavqeyiga shubha yo‘q, albatta. Hamma uni yaxshi ko‘radi. Hakimiyni bir kun kelib APLda ko‘rsak ham ajab emas.
Joao Kanselu
Ayni paytda Pep qo‘l-ostidagi eng yorqin futbolchilardan biri Kanseludir. U chap-qanotda pleymeykerlikni qoyilmaqom qilib bajaradi. Ammo u aslida o‘ng qanot futbolchisidir. Gvardiola jamoasida esa maydonning istalgan nuqtasida o‘ynashni o‘rgandi. Portugaliya terma jamoasi a’zosi uzatmalar va raqib hujumini buzish borasida o‘rnak qilsa arziydigan nomzod.
Ris Jeyms
«Chelsi» akademiyasidan chiqqan futbolchi himoyachilik borasida tug‘ma qobiliyatga ega. Jeyms Tuxel jamoasining uchtalik himoyasida o‘ng qanotga javob beradi. Uning o‘ta aqlli va aniq paslaridan hayratga tushasan kishi. Iste’dod va imkoniyat qo‘shilgan holda Jeyms faoliyatini yanada yorqinroq qilmoqda. Angliya terma jamoasining o‘ng qanot hududini yaqin o‘n yillikda Trent va Jeyms bilan xavfsiz deb hisoblash mumkin.
Boshqalar
Bu borada Jahon chempioni bo‘lgan Benjamen Pavarni ham keltirish mumkin. U ham endigina 25 yoshda. To‘g‘ri, «Bavariya» yulduzi bu mavsumda o‘zining eng zo‘r darajasini namoyish etmayapti. Ammo uni nimalarga qodir ekanini biz siz bilan yaxshi anglaymiz.
«MYU» vakili Eron Uan-Bissakani ham e’tirof etmay iloj yo‘q. Chunki u birga-bir vaziyatlarda yaxshi himoyalanadigan futbolchi. Balki u ham tez orada Angliya terma jamoasida ko‘rinish berar.
Belgiya hamda «Lester Siti» futbolchisi Timoti Kastan ushbu ro‘yxatdan joy olgan. U APLning so‘nggi turida jarohatdan qaytib, «Brentford»ga qarshi bahsda fantastik jarima zarbasini ijro etgandi. U ham Kanselu kabi aslida o‘ng qanotni xush ko‘radi. Kastan shubhasiz, bu borada kuchli o‘nlikka kiradigan darajaga ega.
«Arsenal»ning yangi vakillaridan biri Takexiro Tomiyasu ham o‘ng qanot borasida yaxshi natijalarga ega. U birinchi mavsumini o‘zidayoq Angliyadagi futbol ritmiga moslashib keta oldi. Shuningdek, bu borada «Manchester Siti»ning Kayl Uokeri hamda «Napoli» futbolchisi Jovanni Di Lorensoni qayd etib o‘tish lozim. Xo‘sh, sizningcha, bu pozisiyada dunyoning zo‘ri kim(lar)?
Jaloliddin ISMATOV tarjimasi
