«Barselona» bosh murabbiyi Xavi Ispaniya chempionatining 31-turidan o‘rin olgan «Levante»ga (3:2) qarshi o‘yindagi g‘alaba haqida o‘z fikrlari bilan o‘rtoqlashdi.
“Birinchi bo‘limda o‘yinimiz umuman chiqmadi. Jamoa ham ruhiy, ham jismonan charchagan ko‘rindi. Payshanba kungi o‘yin o‘z ta’sirini ko‘rsatdi. Ammo biz ikkinchi bo‘limni ancha yaxshi o‘tkazdik. Oxirigacha kurashganimiz va muvaffaqiyatga ishonganimiz uchun maqsadimizga erishdik. Lyuk de Yongning goli bizga ko‘p narsa berdi. U ajoyib futbolchi va bunga loyiq.
O‘yin juda qiyin va juda keskin o‘tdi. To‘pni oldinga yetkazib berish muammosini hal qila olmadik, ammo bu uch ochko oltinga teng. Bizning chempionatimiz juda qiyin. «Real» amalda yutqazmaydi. Ularda ham xuddi biz kabi qiyin uchrashuvlar bor. Agar ular keyingi o‘yinlarda ochko yo‘qotishsa, balki ko‘proq narsaga ishonishimiz mumkin», - dedi Xavi Marca bilan suhbatda.
