O‘zbekiston kubogi guruh bosqichi, 2-turidan o‘rin olgan bahsda “Navbahor” o‘z maydonida Samarqandning “Dinamo” jamoasini qabul qiladi.    

Mazkur klublar shu kungacha Superliga (oliy liga) bahslarida 48 marta o‘zaro ro‘baro‘ kelishgan. Ushbu o‘yinlarda namanganliklar 26, “ko‘hna shaharliklar” esa 13 marta zafar quchishgan bo‘lsa, 9 ta uchrashuvda durang qayd etilgan. To‘plar nisbati – 85-43, “Navbahor” foydasiga.

O‘zaro o‘yinlarda “lochinlar” 87, “arslonlar” esa 48 ochkoni qo‘lga kiritishgan.  

Ushbu jamoalar o‘rtasidagi o‘yinlarda eng yirik hisob 1996 va 1997 yillari Namanganda qayd etilgan. O‘sha mavsumlarda “Navbahor” “Dinamo” ustidan tegishlicha 6:0  hamda 7:1 hisoblarida zafar quchgan.

E’tiborlisi, samarqandliklar shu paytgacha namanganliklarni yirik hisobda mag‘lubiyatga uchrata olishmagan.

O‘zbekiston kubogi doirasidagi uchrashuvlarda esa mazkur klublar 1994 va 2010 yillarda 1/4 hamda 1\8 final bahslarida o‘zaro ro‘baro‘ kelishgan.

1994 yilgi chorak final o‘yinlarida “lochinlar” Samarqandda 3:0, Namanganda 4:1 hisoblarida zafar quchib, yarim final yo‘llanmasini qo‘lga kiritishgandi.

2010 yilgi nimchorak bahslarida esa “arslonlar” o‘z maydonlarida 2:1 hisobida g‘alaba qozonib, Namanganda 3:3 hisobidagi durangni qayd etib, chorak finalga yo‘l olishgandi.               

Ushbu jamoalar shu kungacha barcha turnirlarda Namanganda o‘zaro 25 ta uchrashuv o‘tkazgan. Ushbu o‘yinlardan 18 tasida “Navbahor” g‘alaba qozongan bo‘lsa, yana 7 ta bahsda durang qayd etilgan.

Fakt: “Dinamo” hali Namanganda zafar qucha olmagan va viloyatimizda  bo‘lib o‘tgan uchrashuvlarda to‘plar nisbati -  60-14, jamoamiz foydasiga.