«Manchester Yunayted»ning yangi bosh murabbiyi Erik ten Xag tarkibni kuchaytirish imkoniyatiga ega bo‘ladi.

ESPN nashri xabariga ko‘ra, niderlandiyalik mutaxassis transferlar uchun 100 milliondan 150 million funtgacha oladi, tarkibdagi futbolchilar sotilgan taqdirda qo‘shimcha mablag‘ ajratiladi.

"Mankunianliklar" Erik Bayi, Fil Jons, Aleks Telles, Aaron Van-Bissaka va Antoni Marsyallar bo‘yicha tushadigan takliflarni ko‘rib chiqishga tayyor.

Qayd etilishicha, yarim himoyachilar Nemanya Matich, Pol Pogba, Jessi Lingard, Xuan Mata va hujumchi Edinson Kavanilar jamoani erkin agent sifatida tark etishi mumkin.

Darvozabon Din Xendersonning o‘zi ketishni xohlamoqda, ammo «Manchester Yunayted» uni ijaraga berishni afzal ko‘rmoqda.

Shuningdek, Ten Xag o‘zining o‘yin tizimi darvozabon David De Xeaga mos kelishiga shubha qilmoqda, ammo hozir transfer bozorida boshqa muhimroq vazifalar mavjud.

«Manchester Yunayted»ning ustuvor yo‘nalishlari qatorida hujumchi va kamida bitta yarim himoyachi sotib olish bor.