“Turon” – “Andijon” (1:2) jamoalari o‘rtasidagi uchrashuvdan keyin odatga ko‘ra matbuot anjumani o‘tkazildi. Unda dastlab "Andijon" jamoasi bosh murabbiyi Viktor Kumikov ishtirok etdi.
- Bugun olti ochkolik o‘yin bo‘ldi. Hech kimga sir emas, “Turon”da ham, “Andijon”da ham Superligaga chiqish vazifalari bor. Mana shunday o‘yinda yutganimizdan xursandman. Uchrashuv kurashlarga boy bo‘ldi. Kiritilgan gollar esa o‘yinning bezagidir. Bugun uchta gol urildi. Lekin o‘yindan oldin uchta gol uriladi, deb o‘ylamagandim. O‘yin taqdirini birgina gol hal qilsa kerak, degan xayolda edim. Uchta gol urilishi balki chetlatish bilan ham bog‘liq bo‘lishi mumkin. Biz 1:0 hisobida yutayotganimizda maydonda 10 kishi bo‘lib qoldik. Natijada darvozamizdan gol o‘tkazib yubordik. Baribir oxirigacha kurashishgani uchun futbolchilarga rahmat aytmoqchiman. Yakunda muhim uch ochkoni qo‘lga kiritdik.
- Muhammadkarim Toirovning chetlatilishiga qanday munosabat bildirasiz?
- Chetlatishga kelsak, bu haqli ravishda bo‘ldi. Oldin burchak zarbasini amalga oshirdi va to‘p yana o‘ziga qaytdi. To‘pni sherigiga oshirish o‘rniga yana o‘zida ushlab qoldi. Natijada qoida buzishiga majbur bo‘ldi. Hakamlarga hech qanday e’tiroz yo‘q.
- “Turon”ning namoyish etgan o‘yini borasida fikringiz qanday?
- “Turon” yaxshi jamoa. Bejizga yuqori o‘rinlarda emas. Chetlatilishdan oldin o‘yin teng kurashlar ostida kechayotgandi. “Andijon” bilan “Turon”da aksariyat o‘yinchilarning saviyasi bir xil. Faqat o‘yin uslubida farq qilishi mumkin.
- Farhod Sohibjonovni almashtirilishiga qanday izoh berasiz?
- U charchab qoldi. Ko‘rgan bo‘lsangiz, bizga gol urilgan vaziyatda orqaga qaytishga ulgurmay qoldi. Aslida Sohibjonovni oldinroq almashtirmoqchi edim. Undan kuching bormi, o‘ynay olasanmi, deb so‘rasam, ha, kuchim bor degandi. Lekin keyin toliqib qoldi. Menimcha, bor kuchini hujumga sarflab orqaga qaytishga ulgurmay qoldi. Bugun futbolchi almashtirishlarni majburlikdan amalga oshirdik." - dedi Kumikov
