«Osasuna» Ispaniya La Ligasida muxlislarni stadionga biometrik ma’lumotlar asosida kiritish g‘oyasini ilgari surgan birinchi klub bo‘ldi.

Xususan, «Alaves»ga qarshi o‘yin oldidan «Reyno-de-Navarra» stadioni darvozasi yoniga terminal joylashtirildi. Muxlislar stadionga kirishda maxsus mobil ilova vositasida shaxsiy ma’lumotlarini taqdim etishadi. Shuningdek, qo‘l telefonidagi oddiy selfi ham kifoya qilishi mumkin.

Yangi g‘oyaning plyus tomonlaridan biri shuki, stadionga kirishda navbat kutish vaqti sezilarli darajada kamaya­di. To‘g‘ri, terminalga tobi yo‘q, mobil ilovalarni tushunmaydigan fanatlar arenaga oldingidek qog‘oz yoki elektron chipta bilan ham kirishlari mumkin. Xullas, «Osasuna» muxlislarga ikki yo‘ldan birini tanlash imkonini bermoqda: terminal yordamida navbatsiz kirish va chipta bilan ma’lum vaqt kutish.    

«Osasuna» rahbariyatining ma’lum qilishicha, sinov tariqasida yo‘lga qo‘yilgan bu tajriba samarasi kutilgan darajada chiqsa, yaqin kelajakda «Reyno-de-Navarra» stadionidagi barcha kirish darvozalari oldiga texnologik terminallar o‘rnatiladi. Qiziq, moddiy-texnik bazasi boy klublarga to‘la La Ligada stadionga kirishni avtomatlashtirish harakatini nega aynan kamtarin «Osasuna» boshlab berdi? Gap shundaki, Pamplona jamoasi inson shaxsini yuz qiyofasidan aniqlashtirish borasida ma’lum yutuqlarga erishgan dasGate kompaniyasi bilan hamkorlik qiladi. Umuman, «Osasuna» g‘oyasi yaqin orada butun La Ligaga yoyilsa, ajabmas. Chunki Ispaniyadagi aksariyat arenalarning kirish-chiqish yo‘laklarida ko‘pincha uzun nav­bat yuzaga keladi.    

M.PO‘LATOV tayyorladi.