Superliganing 10-turidan o‘rin olgan “Bunyodkor” – “Nasaf” (1:4) uchrashuvidan keyin mehmonlar ustozi Ro‘ziqul Berdiyev o‘z fikrlari bilan o‘rtoqlashdi.

- Uchrashuvni xato bilan boshladik. O‘yindan tashqari holat yuzaga keltirishda xatoga yo‘l qo‘yib, gol o‘tkazib yubordik. Asosiysi, goldan keyin asabiylashmadik. Chunki jamoamiz bunga tayyor edi, shu bois oxirigacha harakat qildik. Ikkinchi goldan keyin tashabbus biz tarafga o‘tdi.

O‘yindan oldin yigitlarga bergan ko‘rsatmalarimizda ham hammasi o‘zimizga bog‘liqligini tushuntirgandik. “Bunyodkor”ga imkon bersangiz yaxshi o‘ynaydi. “Bunyodkor”ni kuchsiz deb bo‘lmaydi. Faqat bir tekisda o‘ynay olmayapti, bu bugun ham ko‘rindi. Ular ba’zida juda kuchli o‘yin ko‘rsatyapti, ba’zida esa barqarorlik yetishmayapti.