Mana ikki yildirki, «Yuventus» nomli klub Italiya chempionligi uchun kurasha olmayapti. Hozirchalik turinliklarning missiyasi YECHL yo‘llanmasi bo‘lib qolmoqda. Milan shahrining ikki jamoasi bilan kurashda imkoniyatni boy berayotgan «keksa sinyora», yozda bir qancha xaridlar orqali tarkibni kuchaytirmoqchi. Bu bilan esa yana chempionlik borasida gegemonlik o‘rnatish niyatida. Quyida «Yuventus» 2021-2022 yilni qanday o‘tkazganiga nazar tashlaymiz.
Mavsum o‘yinchisi – Xuan Kuadrado
Umuman olganda, bu mavsumdan keyin jamoa tarkibidagi kamdan-kam futbolchi o‘z boshini baland ko‘tarib gapira oladi. Kuadrado o‘sha kamyob futbolchilar ichidan joy olgan. Kolumbiyalik himoyachi kuchli barqarorlik namoyish etdi hamda Allegri jamoasining eng foydali futbolchilaridan biri bo‘ldi. Klubning qayd etgan natijasi umumiy holatda yaxshi bo‘lmasada, Kuadradoning o‘zi yomonlar ichida eng yaxshi edi.
Mavsum goli – Kuadrado («Jenoa»ga qarshi)
Burchakdan to‘g‘ri darvoza tomon yo‘llangan to‘p, o‘z manzilini topib boradi. Tasavvur qilgan bo‘lsangiz, albatta bu golning chiroyini ham his qila olasiz. Kuadradoning uzatgan to‘pi aylanma yo‘nalish olgan holda, jarima maydonchasi ichidagi hammadan o‘tib ketadi. Darvozabon esa dog‘da qolgandi. Bunday hayratomus gollarni doim ham ko‘ravermaysiz.
Mavsum o‘yini – «Sampdoriya»ga qarshi (4-1)
Ha, A seriya «Yuventus»ga qayg‘u olib kelgandir. Biroq kubok bahslarida yorqin natijalar bo‘lib turdi. Shulardan biri «Samdoriya» bilan o‘yinda yuz beradi. Chorak final bosqichida har ikki tomon ham tejamkor rejimda, aralash tarkib bilan o‘ynagan edi. Biroq «Yuventus» shu holicha ham raqibdan ancha ustunlik qildi. 4-1 hisobida tugagan bahsda turinliklar to‘p nazoratini 63 foizini oldi. Raqib darvozasi tomon 27 ta zarba berdi. «Sampdoriya»da esa bu ko‘rsatkich 4 ta edi.
Mavsum transferi – Dushan Vlaxovich
Jamoaning qayta qurish borasidagi ilk qadami yanvar oyidagi transferlar bozorida qo‘yiladi. «Yuventus» yosh va talantli markaziy hujumchini, Vlaxovichni xarid qiladi. Ha, u «Yuventus»da «Fiorentina»dagidek sermahsullik ko‘rsata olmadi. Biroq yarim mavsum davomida jamoaning eng yaxshi uchinchi to‘purariga aylangandi. O‘ylaymizki, yangi mavsumda «Yuventus» hayratlanarli nimadir o‘ylab topa olsa, u ham bo‘lsa Vlaxovich orqali amalga oshiriladi.
Mavsumning eng yaxshi o‘sishga erishgan futbolchisi – Danilo
Serqirra futbolchi bo‘lgan Danilo, o‘zining yorqin o‘yinlarini yakuniga yetgan mavsumda ham ko‘rsata oldi. Asosan chap qanot himoyasida harakat qiladigan braziliyalik futbolchi, jarohatlardan aziyat ham chekdi. Ammo sog‘ bo‘lgan paytlarida jamoasiga katta yordami tekkandi. Danilo kelayotgan mavsumning ham yulduzi bo‘lishi mumkin. Chunki Massimiliano Allegri uni asosiy tarkibda o‘ynatishda davom etadi. Himoyachi esa o‘z ishining ustasidir.
ISMATOV J.
