Oradan o‘n bir yil o‘tib, "Milan" yana A seriyada chempion nomiga sazovar bo‘ldi. Stefano Pioli shogirdlari so‘nggi turda g‘alaba qozonish orqali masalani hal qildi. Umuman olganda, Milan shahrining ikki jamoasi mavsum davomida chempionlik uchun kurashib keldi. Biroq, yakunda bu nom "Milan"ga nasib qildi. "Rossoneri"lar uchun yakuniga yetgan mavsum yorqin xotiralarga boy bo‘ldi. Quyida jamoaning o‘tkazgan mavsumiga qisqacha to‘xtalib o‘tamiz.
Mavsum o‘yinchisi – Rafael Leao
Bu tanlovni qilish unchalik ham qiyin emasdi. Chunki Leao mavsum kashfiyoti bo‘lish bilan birga, Italiya chempionatining eng yorqin futbolchisi sifatida ko‘rinish berdi. Portugaliyalik futbolchi asosan chap qanot hujumida harakat qiladi. Ammo imkon bo‘lishi bilan maydonning istalgan bo‘sh zonasida paydo bo‘ladi. Uning harakatlari 14 ta gol hamda 12 ta assistda namoyon bo‘ldi. 22 yoshli hujumchiga "Real" qiziqa boshlagani ham bejiz emasdi.
Mavsum goli – Teo Ernandes ("Atalanta"ga qarshi)
Teo Italiya futbolidagi eng yaxshi himoyachilardan biridir. Buni u "Atalanta" bilan bahsdagi fantastik gol bilan isbot etdi.
Ernandes to‘p bilan harakatni o‘z jarima maydonchasi oldidan boshladi. Katta tezlik bilan katta masofani bosib o‘tdi va raqibning to‘rtta futbolchisini dog‘da qoldirdi. Zarba esa yaqin burchakning pastiga yo‘llanadi. Bu vaziyat esa chiroyli gol bilan yakun topgandi.
Mavsum o‘yini – "Lasio"ga qarshi (1-2)
O‘yin to‘rt daqiqa ichida "Lasio" futbolchisi Immobilening goli bilan boshlanadi. Ammo bu gol "Milan"ni g‘azabga keltirgandi. Pioli shogirdlari o‘yin tizginini qo‘lga oldi. To‘pga jami 53 foiz egalib qilib, raqib darvozasiga 25 marta zarba berdi. Bu borada esa "Lasio"da faqat 7 ta edi. Olivye Jiru ikkinchi taym avvalida hisobni tenglashtiradi. Ammo bu hali hammasi emasdi. O‘yinning 92 daqiqasida Sandro Tonali hal qiluvchi zarbani yo‘llab, 3 ochkoni naqd qilgan edi.
Mavsum transferi – Mayk Menyan
Janluiji Donnarumma kabi yuqori darajali darvozabonni tekinga qo‘yib yuborish, dunyodagi istalgan klubni xafa qilgan bo‘lardi. Ammo "Milan" uning o‘rniga ajoyib nomzod topdi – 15 million yevroga Menyan keltirildi. Sobiq "Lill" kiperi ajoyib harakat qila oldi. Menyan 32 ta o‘yinda maydonga tushib, atigi 21 ta gol o‘tkazib yubordi. 17 ta bahsda esa maydonni "quruq" tark etdi. U hatto "Sampdoriya"ga qarshi o‘yinda Leaoning goliga assistentlik ham qilgan.
Eng yaxshi o‘sishga erishgan futbolchi – Pyer Kalulu
Aslida bu aspektda ham Leaoni tanlash mumkin edi. Ammo biz uning o‘rniga yosh himoyachi Kaluluni olishga qaror qildik. 21 yoshli futbolchi mavsumni zaxira vakili sifatida boshlagan edi. Biroq yakunni asosiy tarkib a’zosi bo‘lib tugata oldi. Shuni ham ta’kidlash lozimki, Kalulu ishtirok etgan o‘yinlarni hech birida "Milan" mag‘lubiyatga uchramagan! O‘ylaymizki, ikki oydan keyin boshlanajak yangi mavsumda ham Pyer porlashni davom ettiradi. Chunki bu uchun unda yaxshi imkon mavjud.
ISMATOV J.
