Yarim himoyachi Luka Modrich va Madridning “Real” klubi shartnomani uzaytirishga kelishib oldi. Fabrisio Romanoning so‘zlariga ko‘ra, kelishuv 8 iyun, chorshanba kuni rasman e’lon qilinishi rejalashtirilgan.

Tomonlar 2023 yilgacha bo‘lgan shartnoma borasida kelishib oldilar. Qolaversa, 36 yoshli xorvatiyalik futbolchiga futbolchilik faoliyatini yakunlagach, klub tizimida ishlash imkoniyati taklif qilingan.

Eslatib o‘tamiz, xorvatiyalik yarim himoyachi 2012 yilning avgustida Angliyaning "Tottenxem" klubidan "Real"ga o‘tgan edi. Klub bilan u 20 ta sovrinni qo‘lga kiritdi.

Modrich yakunlangan mavsumda Madrid klubi safida 45 ta o‘yinda maydonga tushib, 3 ta gol urdi va 12 ta golli uzatmani amalga oshirdi.