Germaniyaning “Transfermarkt” portali Italiya A Seriyasida to‘p suruvchi futbolchilarning yangilangan transfer narxlarini ma’lum qildi.
Unga ko‘ra, Rimning “Roma” klubi safida to‘p suruvchi o‘zbekistonlik hujumchi — Eldor Shomurodovning transfer summasi 8 million yevroni tashkil etdi. Ushbu summa uning avvalgi transfer narxidan 2 million yevroga kam hisoblanadi.
Hujumchi Rim klubiga o‘tgan yili 14 million yevro evaziga ko‘chib o‘tgan va portal shundan so‘ng uning taxminiy narxini 10 millionga ko‘targan edi. Mavsum yakunlariga ko‘ra esa, portal asosan zaxirada o‘tirgan futbolchining transfer summasini 2 million yevroga kamaytirdi.
Ma’lumot uchun, Shomurodov o‘tgan mavsum “Roma” tarkibida A Seriya doirasidagi 28 ta o‘yinda maydonga tushib, 3 ta gol va 4 ta assist qayd etdi. Uning klub bilan shartnomasi 2026-yilning 30-iyuniga qadar mo‘ljallangan. O‘tgan mavsumda u klubi bilan Yevropa Konferensiyalar Ligasining ilk chempioniga aylangan.
