Himoyachi Serji Roberto «Barselona»da qoladigan bo‘ldi. Klub bilan shartnomasi yakunlanib, erkin agentga aylangan 30 yoshli futbolchi "Barsa" bilan bir yillik shartnoma borasida kelishuvga erishdi.

"Ko‘k-anorranglilar" prezidenti Joan Laportanin tig‘iz taqvimi tufayli shartnomani rasmiylashtirish ortga surilib kelayotgandi. Roberto «Kamp Nou»da qolish uchun maoshining keskin kamaytirilishiga rozi bo‘ldi. Ispaniyalik futbolchining yillik maoshi 12 million yevro edi (soliqlar chiqarib tashlanmasidan avval), shuningdek yaxshigina mukofot pullari ko‘zda tutilgandi. Yangi shartnomada Roberto yiliga 5 million yevro ishlab topadi. Albatta, bu summadan soliqlar chiqarib tashlanadi. Shuningdek, bonuslar miqdori ham kamaytirildi.

Eslatib o‘tamiz, Roberto va «Barselona» ancha vaqtgacha yangi shartnoma borasida bir to‘xtamga kela olishmadi. Klub uning talabini qanoatlantirishga tayyor emasdi. Muzokaralar boshi berk ko‘chaga kirib qolgandi, ammo futbolchining agentlari klub rahbariyati bilan muzokaralarni davom ettirishdi. Yakunda tomonlar til topisha olishdi.

Serji «Barselona»da qolish uchun boshqa jamoalardan tushgan takliflarga rad javobini berdi. Roberto yakunlangan mavsumda klub safida 12ta o‘yinda ishtirok etib, bitta gol muallifiga aylandi.