Superliga 12-turining markaziy va shiddatli o‘yinlaridan biri Samarqandda o‘tadi. Turnir jadvalining quyi pog‘onalarida borayotgan «Dinamo» va «Surxon» jamoalari o‘zaro to‘qnash kelishadi. Samarqand «Surxon» uchun ham joriy mavsum uy maydoniga aylangandi.

Kim qanday holatda?
Ushbu bahsdagi g‘alaba Andrey Shipilov va Anxel Lopes murabbiyligidagi jamoalar uchun juda muhim. «Dinamo» oxirgi o‘yinlarida ketma-ket so‘nggi daqiqalarda ochkolarni boy berib 6 ochko bilan 14-o‘rinda bo‘lsa, «Surxon» «Bunyodkor»ni mag‘lub etib, oradagi farqni 3 ochkoga yetkazdi va 9 ochko bilan 11-o‘ringa ko‘tarildi.

«Dinamo»ning so‘nggi 5 o‘yini:
6-tur. Dinamo – Neftchi – 1:1
7-tur. Olimpik – Dinamo – 1:1
8-tur. Dinamo – Navbahor – 0:1
9-tur. Metallurg – Dinamo – 2:1
10-tur. Dinamo – AGMK – 1:2

«Surxon»ning so‘nggi 5 o‘yini:
7-tur. Surxon – Qo‘qon-1912 – 1:0
8-tur. Paxtakor – Surxon – 2:2
9-tur. Surxon – So‘g‘diyona – 2:4
10-tur. Qizilqum – Surxon – 2:0
11-tur. Surxon – Bunyodkor – 1:0

Eski tanishlar
«Dinamo» tarkibidan Ibrohim Yo‘ldoshev o‘tgan mavsum «Surxon» sharafini himoya qilgan bo‘lsa, «Surxon» tarkibida darvozabon Shohrux Eshbo‘tayev, Sharofiddin Shobirov, Jahongir Ahmadov singari o‘yinchilar o‘tgan yillar davomida Samarqand klubi safida to‘p surgan.

Tarkibda yo‘qotishlar bormi?
Ushbu uchrashuvda sariq kartchokalari soni 4taga yetgani sababli yarimhimoyachi Muzaffar Muzaffarov «Dinamo»ga yordam bera olmaydi. «Surxon» tarkibida ham diskvalifikasiya qilingan o‘yinchi bor – Iqbol Malikjonov qizil kartochkasi uchun 3 o‘yinga diskvalifikasiya qilingan.

O‘zaro o‘yinlari tarixi: Ustunlik «Dinamo»da
Samarqand va Termiz klublari Oliy liga va Superliga tarixida 1992 yildan buyon jami 22 o‘yinda o‘zaro maydonga tushgan. Raqiblarning uzoq vaqt o‘zaro o‘ynamagani sababi 2005-2017 yillar davomida «Surxon» klubining yuqori divizionda to‘p surmagani sabab bo‘lgan. Jami 22 o‘yindan 9 bahsda «Dinamo»ning qo‘li baland kelgan bo‘lsa, 8 uchrashuvda «Surxon» ustun kelgan. 5 o‘yinda durang qayd etilgan. To‘plar nisbati – 26:29.