Xabaringiz bor, og‘ir atletika bo‘yicha yurtimizda o‘tkazilgan o‘smirlar va yoshlar o‘rtasidagi Osiyo chempionati bugun o‘z yakuniga yetdi. Musobaqaning so‘nggi kuni ham sportchilarimiz uchun omadli keldi. O‘z vazn toifasida barcha yo‘nalishlarda oltin medalni qo‘lga kiritib, Osiyo chempioni bo‘lgan hamyurtimiz Tursunoy Jabborovaning musobaqa taassurotlari bilan qiziqdik.

“Musobaqadan olgan taassurotlarim juda yaxshi. Men Osiyo va Jahon chempionatlarida ko‘p bora qatnashganman. Kattalar o‘rtasida o‘tkazilgan Jahon chempionatida dast ko‘tarish bo‘yicha 1-o‘rin, ikkikurash natijasiga ko‘ra 2-o‘rinni olganman. Lekin bu musobaqa menda boshqacha taassurot qoldirdi. Avvalambor, musobaqaga vatanimiz mezbonlik qilyapti. Qolaversa, biz sportchilar yuqori natijalar bilan yurtimiz sha’nini munosib himoya qilayotganimiz va shohsupaga ko‘tarilayotganimiz ham bizga o‘zgacha ruhiyat, ko‘tarinkilik bag‘ishlamoqda. O‘zim o‘ylagan natijaga erishdim. +87 kg vazn toifasida dast ko‘tarish bo‘yicha ham, siltab ko‘tarish bo‘yicha ham oltin medallarni qo‘lga kiritib, Osiyo chempioni bo‘ldim. Asosiy raqiblarimdan biri o‘zimizning yurtdoshimiz, jamoadoshim, ikkinchisi esa vetnamlik sportchi bo‘lishdi. Kelgusida bundan ham yaxshi natijalarga erishib, Parij-2024 Olimpiadasida qatnashish va O‘zbekiston bayrog‘ini yanada yuqorilarga ko‘tarishga harakat qilaman”, — dedi g‘olib sportchimiz.