Londonning «Chelsi» klubi shu bugunga qadar transferlar oynasida o‘ta faol bo‘lgani yo‘q. To‘g‘ri, ikki yirik xaridga qo‘l urildi. Ammo bu yetarli bo‘lmaydi. Shunga qaramay, hali vaqt bor. Tomas Tuxel «Arsenal»ga qarshi mag‘lubiyatli o‘yindan keyin yana bir qancha xaridlar qilish kerakligini ta’kidlagandi. U ayniqsa himoya chizig‘ini kuchaytirish kerakligiga urg‘u bergan. Chunki jamoa yaqinda ikki top-himoyachisi - Antonio Ryudiger hamda Kristensenni erkin agent sifatida qo‘yib yuborishga majbur bo‘ldi. Quyida «Chelsi» tarkibining sotib olingan va olinmoqchi bo‘layotgan futbolchilari bilan qanday ko‘rinishga kelishi mumkinligi haqida gaplashamiz.

«Aristokratlar» yangi mavsumga qadar Sesar Aspilikueta hamda Markos Alonsodan ham mahrum bo‘lishi mumkin. Shu sababli, jamoa himoya, xususan, markaziy himoya uchun variantlar qidirishi lozim. Ayni damda esa «Chelsi»da shunday nomzod bor. U «Leypsig» vakili Yoshko Gvardioldir. G‘arbiy londonliklar Xorvatiya terma jamoasi a’zosi o‘rniga Bundesligani yaxshi biladigan Timo Vernerni taklif etmoqchi. Bundan ikki mavsum avval Verner, aynan «Leypsig»dan xarid qilingan edi. «Chelsi» o‘zining ustuvor maqsadi bo‘lgan Jyul Kundedan ayrilgach, endi yuqoridagi usulni qo‘llashga harakat qilmoqda. Ammo «Leypsig» bu taklifga rozilik bermayotir.

«Chelsi»ning yarim himoya uchun ham rejalari mavjud. Xususan, «Manchester Yunayted» nishoni bo‘lgan Frenki De Yongni tortib olish, mana shu amaliyotning bir qismidir. Agarda De Yong xaridi muvaffaqiyatli amalga oshirilsa, u holda Tuxel ixtiyorida ancha takomillashgan va barqaror asosiy tarkib yuzaga keladi. Bu tarkibni nemis mutaxassisi har xil uslubga solib o‘ynatishi mumkin.

Tomas Tuxel «Chelsi»dagi faoliyati davomida asosan 3-4-3 taktik sxemasi orqali zafar quchib kelayotgan edi. Agarda yuqoridagi ikki xarid amalga oshsa, u holda quyidagicha joylashuv xaritasi yuzaga keladi. Unga ko‘ra, Eduar Mendi qo‘riqlaydigan darvozani uchta himoyachi, Tiagu Silva, Yoshko Gvardiol hamda Kalidu Kulibali himoya qiladi. Ris Jeyms o‘ng qanotga, Ben Chilvell esa chapga joylashadi. Markaziy yarim himoyadan N'Golo Kante hamda Frenki De Yong joy oladi. Meyson Maunt, Raxim Sterling hamda Kay Xaverts Tuxel hujumini tashkil etib berishadi.
Shuningdek, Tuxel yuqoridagi futbolchilardan 4-3-3 ko‘rinishida foydalanishi ham mumkin. Bir paytlar nemis murabbiyi «Borussiya Dortmund»da aynan mana shunday taktikani qo‘llab, harakat qilgan. Bu variantda markaziy himoyani Kulibali hamda Gvardiol tashkil etib beradi. Qanotlar har doimgidek Jeyms hamda Chilvellga topshiriladi. Tayanchda Jorjinyo harakat qilgan holda, yarim himoyaning yuqori chizig‘ida Kante hamda De Yong joylashadi. Sterling Xavertz bilan «yolg‘on to‘qqizlik»ni hosil qiladi. Ularga qanotda Maunt yordam beradi.

ISMATOV J.