“Barselona” hujumchisi Pyer-Emerik Obameyangning Londonning “Chelsi” klubiga o‘tishi ehtimoli tobora ortib bormoqda. Bugun gabonlik futbolchining vakili "ko‘k-anorranglilar" shtab-kvartirasida paydo bo‘ldi, u yerda go‘yoki Obameyangning kelajagi muhokama qilindi. Bu haqda jurnalist Jerar Romero xabar berdi.
Obameyangga "Chelsi" bosh murabbiyi Tomas Tuxelning shaxsan o‘zi qiziqmoqda. Germaniyalik murabbiy oldin hujumchi bilan Dortmundning «Borussiya» klubida ishlagan.
Obameyang shu qishda "Barselona"ga o‘tdi, ammo qisqa vaqt ichida o‘tgan mavsumda "ko‘k-anorranglilar"ning eng yaxshi to‘purariga aylana oldi.
Eslatib o‘tamiz, avvalroq Obameyang Premer-ligada Londonning "Arsenal" jamoasida o‘ynagan.