O‘zbekiston Superligasi 15-turidan o‘rin olgan “Navbahor” – “Surxon” o‘rtasidagi uchrashuv arafasida “lochinlar”ning yaqinda 22 yoshni qarshi olgan mahoratli yarim himoyachisi Asadbek Sobirjonov bo‘lajak o‘yin haqidagi fikrlari bilan o‘rtoqlashdi.
- Xabaringiz bor, jamoamiz 2-davra bahslarini ham omadli tarzda boshlab, Qarshidan muhim g‘alaba bilan qaytdi va peshqadamlik mavqemizni mustahkamladik. Shu bois, endi jamoamiz uchun har bir o‘yin finalga teng.
Bo‘lajak bellashuv borasida to‘xtaladigan bo‘lsam, garchi “Surxon” ayni paytda turnir jadvalining quyi pog‘onalarida borayotgan bo‘lsada, har bir raqibga hurmat bilan yondashish lozim.Boisi, Superligada oson o‘yinlar bo‘lmaydi.
Biz – futbolchilar ertangi bahsda g‘alaba qozonib, muxlislarga quvonch ulashish, peshqadamliklikni yanada mustahkamlashga intilamiz. Faqat buning uchun ishqibozlardan jamoamizni bevosita stadionda munosib tarzda qo‘llab-quvvatlab turishlarini so‘rab qolaman.
Fursatdan foydalanib, bizga barcha sharoitlarni yaratib berayotgan Namangan viloyati hokimi Shavkat Shokirjanovich Abdurazzoqov, shuningdek, “Navbahor” PFK rahbariyati, jumladan, klub prezidenti Otabek Arifovich Samatovga jamoamiz nomidan o‘z minnatdorchiligimni bildiraman.
Jamoamiz joriy mavsumda o‘z oldiga qo‘ygan yuksak maqsad, ya’ni, Osiyo Chempionlar Ligasi yo‘llanmasini qo‘lga kiritish uchun oxirigacha kurash olib boradi hamda buni amalga oshirish uchun biz – futbolchilar qo‘ldan kelganicha harakat qilamiz.
