"Yuventus" haligacha "PSJ" bilan yarim himoyachi Leandro Paredesning transferi borasida kelishuvga erisha olmadi, deb xabar beradi Sky Sports Italia.
"Zenit"ning sobiq futbolchisi allaqachon Turin klubi bilan shartnoma bo‘yicha kelishib olgan, biroq klublar transfer summasi borasida kelisha olmayapti. Shu munosabat bilan "Yuventus" muqobil kuchaytirish variantini izlay boshladi.
Avvalroq, 28 yoshli argentinalik futbolchi tibbiy ko‘rikdan o‘tish va "Yuventus" bilan shartnoma imzolash uchun 29 avgust, dushanba kuni Turinga uchib ketishi haqida xabar berilgandi.
Paredes o‘tgan mavsumda 22 o‘yin o‘tkazib, 1 gol va 2 golga assistentlik qilgan.
Paredesning "PSJ" bilan amaldagi shartnomasi 2023 yilning iyuniga qadar davom etadi. Avvalroq parijliklar yarim himoyachini 25 million yevroga sotishga tayyor ekani haqida xabar berilgandi.
