Pro Liga peshqadami bo‘lib turgan "Andijon" jamoasi o‘zining avgust oyidagi eng yaxshi futbolchisini aniqladi.

"Zukko muxlislarimiz yaxshi bilishadiki, har oyda jamoamizning eng yaxshi futbolchisini aniqlab kelmoqdamiz.

Albatta, bunda siz aziz muxlislarning so‘rovingiz muhim ahamiyat kasb etmoqda. Faqat iyul oyida chempionatimizda tanaffus bo‘lib, asosan yozgi o‘quv-mashg‘ulot yig‘inlari sababli rasmiy uchrashuvlar o‘tkazilmadi.

Avgust oyidan boshlab pro ligada chempionat yana davom ettirilmoqda.

O‘tgan oyda “Andijon” 4 ta o‘yin o‘tkazdi va barcha raqiblarini “Bobur Arena”da qabul qildi. E’tiborlisi, hamma o‘yinda jamoamiz g‘alaba qozonishga muvaffaq bo‘ldi.

Har bir uchrashuvdan keyin telegram tarmog‘idagi rasmiy sahifamiz orqali eng yaxshi futbolchi nominasiyasida so‘rov o‘tkazib kelinmoqda. Natijada oy yakuniga kelib, tashkil etilgan 4 ta o‘yindagi futbolchilaring to‘plagan umumiy ovozlari hisoblab chiqildi.

Unga ko‘ra, jamoamizning avgust oyidagi eng yaxshi futbolchisi – bu yana bir bor Shahboz Erkinovga nasib qildi.

Yodingizda bo‘lsa, tajribali hujumchi may oyida ham jamoamizning eng yaxshi o‘yinchisi degan nomga sazovor bo‘lgandi.

Shuni alohida ta’kidlash kerakki, jamoamiz safida oyning eng yaxshi o‘yinchisi bo‘lish uchun kurash juda qizg‘in kechdi. Aslida har bir futbolchimiz g‘alabaga munosib hissasini qo‘shdi. Shuning uchun ham avgust oyini muvaffaqiyatli o‘tkaza oldik. Faqatgina muxlislarning umumiy so‘rovi bo‘yicha bu gal ham Erkinov eng ko‘p ovoz to‘pladi – 1468.

Avgust oyi yakunlari bo‘yicha so‘rovnomada kuchli beshtalik quyidagicha ko‘rinish oldi:

1. Shahboz Erkinov - 1468
2. Farhod Sohibjonov - 1148
3. Goran Miloyko - 1048
4. Muhammadkarim Toirov - 924
5. Suhrob Berdiyev – 840

Bugun jamoamizning navbatdagi mashg‘uloti oldidan bosh murabbiy Viktor Kumikov oyning eng yaxshi futbolchisiga atalgan maxsus statuetkani Shahboz Erkinovga topshirdi" - deyiladi andijonliklarning matbuot xizmati tomonidan tarqatilgan bayyonotda.