"Chelsi" bosh murabbiyi Grem Potter himoyachi Tiago Silva "Kristal Pelas"ga qarshi o‘yinda osonlik bilan qizil kartochka olishi mumkinligini tan oldi.
Shanba kuni "Selhurst Parkd"da bo‘lib o‘tgan Premyer-liga o‘yinida Pyer-Emerik Obameyangga golli uzatma berishdan biroz oldin, Silva ataylab raqibning hujumini qo‘llari bilan to‘xtatib qoldi.
2:1 hisobidagi g‘alabadan so‘ng Potter voqeaga izoh berib, bosh hakam Kris Kavana braziliyalik faxriyga rahmi kelganini tan oldi.
"Menimcha, bu o‘yin qoidasi buzilishi edi. Uni darvozadan ancha uzoqda sodir bo‘lgani qutqardi, ammo qaror boshqacha bo‘lishi mumkin edi. Bu munozarali vaziyat va men Patrikning (Viyeyra) hafsalasi pir bo‘lganini tushunaman" - dedi Potter BBC bilan suhbatda.