«Ufa» klubi sobiq bosh murabbiyi, hozirda «Rotor»da ishlayotgan Aleksey Stukalov o‘zbekistonlik yarim himoyachi Oston O‘runovning salohiyatiga yuqori baho berdi.

— O‘runov — yaxshi futbolchi. «Ufa»dagi faoliyatida dastlab uni jarohatlar qiynadi. Qishki yig‘inda uning tayyorgarlik rejasiga o‘zgartirish kiritdik. Natijada u bahordan boshlab o‘yinlarda ishtirok etdi. Hozir uni qanday muammo qiynayotganini bilmayman. Shu bois, «Ural» haqida gapira olmayman.

— Oston «Spartak»dan keyin «Ufa»ga kelib futbolga munosabatini o‘zgartira oldimi?
— Boshlang‘ich bosqichda unga nisbatan ba’zi savollar bor edi. Keyin esa vaziyatni o‘zgartirdik. Maydonda ham, uning tashqarisida ham u bilan muammolarga duch kelmaganman.

— O‘runov salohiyat bo‘yicha RPLning o‘rtamiyona jamoasiga mos futbolchimi yoki ehtimol yuqoriroq saviyadami?
— O‘ylashimcha, O‘runov o‘rtachadan yuqoriroq saviyada futbolchi. Harakatlaridagi koordinasiya va texnikasi yaxshi. Agar bir o‘yinda uning sprintlari soniga qarasak, undagi saviya juda yuqori.