O‘FA birinchi vise-prezidenti Ravshan Ermatov Vengriyaga qarshi bahs oldidan O‘zbekiston ayollar milliy terma jamoasi a’zolari bilan uchrashdi.

Suhbat davomida O‘FA tomonidan so‘nggi paytlarda ayollar futbolini ommaviylashtirish, mavjud sharoit va kamchiliklarni o‘rganib borish hamda ularni bartaraf etish, bosqichma-bosqich rivojlantirish borasida tizimli ishlar qilinayotgani ta’kidlandi.

Xususan, ayollar milliy terma jamoasi oldiga Olimpiada va Jahon chempionatida ishtirok etish vazifasi qo‘yilgani, bu yo‘lda xalqaro maydonda o‘z o‘rniga ega jamoalar bilan uchrashuvlar o‘tkazib, doimiy tajriba orttirib borish muhim ekanligi aytib o‘tildi. Ilgari ayollar jamoasi bilan bu kabi o‘yinlar tashkil etish muammo bo‘lgani, endilikda bu masalada oldinga qadamlar tashlangani qayd etildi.

Shuningdek, futbolchi va murabbiylar bilan suhbatda ijobiy natijalarga erishish uchun O‘FA tomonidan barcha zarur sharoitlar taqdim etilishi ma’lum qilindi. O‘z o‘rnida jamoamizning bir qator yetakchi futbolchilari ham o‘z fikrlarini bildirib o‘tishdi. Murabbiylar shtabi bilan tayyorgarlik jarayoni va jamoaning mashg‘ulotlari va ayni paytdagi holati xususida suhbatlashildi.

Tibbiy shtab tomonidan futbolchilarning sog‘ligi, tiklanishi va vitaminizasiyalash jarayoni borasida ma’lumotlar eshittirildi. Futbolchilarga eng zamonaviy, yuqori darajadagi tibbiy yordam ko‘rsatish amaliyotini davom ettirishga ko‘rsatma berildi.