Bugun O‘zbekiston va Qozog‘iston terma jamoalari o‘rtasida o‘rtoqlik uchrashuvi bo‘lib o‘tadi. Ushbu bahs oldidan Qozog‘iston futbol federasiyasi prezidenti Adlet Barmenkulov O‘FAga tashrif buyurdi va O‘FA birinchi vise-prezidenti Ravshan Ermatov bilan uchrashdi.

Dastlab Ravshan Ermatov mamlakatlar o‘rtasidagi yaqin qo‘shnichilik aloqalari hamda futbolni rivojlantirish borasida harakatlar yangi bosqichga chiqqanidan mamnun ekanligini bildirdi. O‘z navbatida, Qozog‘iston futbol federasiyasi rahbari Adlet Barmenkulov yangi istiqbolli loyihalarni birgalikda amalga oshirishga tayyor ekanligini aytdi.

Uchrashuv davomida Ikki davlatda futbolni rivojlantirish va ommalashtirish, o‘zaro tajriba almashish, futbol assosiasiyalari o‘rtasida har tomonlama hamkorlikni yo‘lga qo‘yish masalalari keng muhokama qilindi.

Tadbir davomida O‘zbekiston futbol assosiasiyasi va Qozog‘iston futbol federasiyasi o‘rtasida memorandum imzolandi.

Memorandumda ikki mamlakatlarning barcha yosh toifalardagi terma jamoalari hamda klublari ishtirokida xalqaro musobaqalar va o‘rtoqlik uchrashuvlarini tashkil etish bo‘yicha bandlar mavjud. Murabbiylar, hakamlar va yana qator yo‘nalishlar bo‘yicha futbol mutaxassislarini tayyorlash uchun almashinuv dasturlarini ishlab chiqish, bolalar futbolini rivojlantirishga ko‘maklashish nazarda tutilgan.