O‘zbekiston futbol assosiasiyasi tomonidan Respublikadagi futbol mahorat maktablari direktorlari uchun bolalar-o‘smirlar futboli yo‘nalishi bo‘yicha tajriba almashish va yangi loyihalarni mamlakatimizda tatbiq qilish maqsadida Turkiyada «master-klass» tadbirlari tashkil qilinyapti.

Kecha delegasiya vakillari Turkiyada yil sayin o‘z o‘rnini mustahkamlab borayotgan, mamlakatning Yevropa qismidagi eng kuchli akademiyaga aylangan Oltino‘rda bazasida bo‘lishdi.

Turkiya afsonasi Metin Oktay nomiga qo‘yilgan mazkur akademiya «Izmir Cup» musobaqasi bilan Yevropada o‘z o‘rniga ega. Musobaqada har yili 64 ta jamoa ishtirok etadi. Ishtirokchilar orasida «Barselona», «Bavariya» va «Manchester Siti» kabi grand jamoalarni ham ko‘rish mumkin.

Tashrif davomida delegasiya vakillariga zamonaviy akademiya  tashkil etish yuzasidan tushunchalar berildi. Futbolchilarni saralash tizimi, murabbiylarning malakasini oshirish dasturi, infratuzilma va maydonlar yo‘nalishi bo‘yicha muhim masalalar o‘rganildi.

Ta’kidlash kerak, delegasiya Oltino‘rdaning Izmirdagi ish uslubini o‘rganishi va Yashilyurtdagi eng birinchi filialga tashrif buyurishi rejalashtirilgan.

Bundan tashqari, 26 noyabr kuni delegasiya vakillari Otabek Shukurov faoliyat olib borayotgan «Fatix Karagumruk» akademiyasiga tashrif buyuradilar va shu kuni Turkiyaning U-19 ligasida ishtirok etadigan «Galatasaroy» jamoasining o‘yiniga borib ko‘radilar. Shu bilan bir qatorda akademiya direktori Orxan Atik bilan «Galatasaroy» infratuzilmasi yaqindan o‘rganiladi.

27 noyabr kungi rejaga ko‘ra «Beshiktosh» akademiyasiga safar uyushtiriladi. Shu kuni Turkiya bolalar ligasi tur uchrashuvlarini borib ko‘rish hamda Istanbuldagi ommaviy futbol dasturi bilan yaqindan tanishish rejalashtirilgan.