Asli kelib chiqishi beloruslik, yaqinda O‘zbekiston fuqaroligini qabul qilgan Vladislav Kosminin "Metallurg" bilan shartnoma imzoladi.

Mamlakatimizga 2017 yili kirib kelgan va AGMKda to‘p tepgan Kosminin keyinchalik "Qizilqum", "Turon" jamoalarida o‘ynadi. O‘tgan mavsum esa Tojikistonning "Istiqlol" jamoasiga ko‘chib o‘tdi va Osiyo chempionlari ligasida ishtirok etdi.

Futbolchilik faoliyatini 2006 yili Belorusning "Naftan" jamoasida boshlagan Vladislav ushbu yurtning "Polosk" (2010), "Volna" (2011/2012), "Granit" (2013), "Vitebsk2 (2014), "Neman" (2016) klublarida ham to‘p tepdi. Poytaxt viloyatimizda ikki mavsum o‘ynagach (2017/2018) yarim mavsum Qozog‘iston chempionatida ham ko‘rinish berdi.

2019 yilni "Oqjetpes" jamoasida boshlagan Vladislav ikkinchi davradan yana Olmaliqliklar tarkibiga kelib qo‘shildi. 2018 yilda O‘zbekiston kubogi sohibiga aylandi. 2020 yilni Navoiyda, 2021 yilni esa Yaypan jamoasida o‘tkazdi. Bekobodga esa Dushanbe jamoasidan kelib qo‘shildi. "Istiqlol" tarkibida Tojikiston Superkubogini qo‘lga kiritdi. OFK chempionlari ligasida 5 ta o‘yinda maydonga chiqib, 1 ta gol urdi.

Shu yillar davomida 33 yoshli futbolchi 278 uchrashuvda maydonga tushgan. Raqiblar darvozasiga 27 ta gol kiritgan.

Vladislav Kosminin – 33 yoshda, 1990 yilning 17 yanvar sanasida tug‘ilgan.
Tug‘ilgan joyi – Belorus, Novopolosk.
Bo‘yi – 196 sm
Vazni – 91 kg.
Ampluasi – markaziy himoyachi