Turkiyaning Antaliya shahrida qishki tayyorgarligining uchinchi bosqichini o‘tkazayotgan «Andijon» oldindan reja qilinganidek, 31 yanvar kuni Ruminiyaning “Chiksereda” klubiga qarshi o‘rtoqlik uchrashuvida maydonga tushadi. Bu andijonliklarning Antaliyadagi ilk o‘yiniga aylanadi.

Xo‘sh, ilk raqib – “Chiksereda” haqida nimalarni bilamiz? Tabiiyki, muxlislarimiz ham bu borada kengroq ma’lumot olish istagidalar.

Aslida jamoaning to‘liq nomi “Chiksereda Merkurya Chuk” deb nomlanadi. 1904 yilda tashkil topgan. Ruminiyada Liga-2 chempionatida qatnashadi. Bu o‘zimizning pro liga kabidir. Birinchi raqamli musobaqasi Liga-1.

Ruminiya Liga-2 musobaqasida jami 20 ta klub ishtirok etadi. “Andijon”ning bo‘lajak raqibi turnir jadvalida 20 ta klub orasida 7-o‘rinda boryapti. Bu jamoa 4 yildan buyon Liga-2 vakili bo‘lib kelmoqda.

Raqibimiz haqida eng muhim ma’lumot shundaki, yaqinda jamoada yangi bosh murabbiy ishga kirishdi. Germaniyalik Verner Byorger “Chiksereda” ustozi sifatida faoliyatini boshladi. U shu yilning 23 yanvar kuni rasman bosh murabbiy etib tayinlandi. 1958 yilning 23 aprel kuni Germaniyaning Konstans shahrida tavallud topgan. Byorgerning oxirgi jamoasi Shotlandiyaning “Dandi Yunayted” jamoasi hisoblanadi. U yerda murabbiylar shtabida ishlagan. Oradan bir necha mavsum o‘tganidan keyin Verner “Chiksereda” taklifini qabul qildi.

Germaniyalik mutaxassisdan avval Ruminiya klubini mahalliy murabbiy Barna Bayko boshqarib kelayotgandi. Ammo u o‘z joyini nemis mutaxassisiga bo‘shatib berganiga qaramay, “Chiksereda”ning murabbiylar shtabida ishlashda davom etyapti.

Klub uy o‘yinlarini “Municipal Miercurea Ciuc” stadionida o‘tkazadi. Bu kamtarona o‘yingoh bo‘lib, o‘z bag‘riga 2000 ming muxlisni sig‘diradi.

Klub yetakchisi va sardori – bu vengriyalik David Kelemen. O‘z vaqtida Vengriya U-21 terma jamoasida 11 ta o‘yinda maydonga tushgan. 2022 yilning iyul oyidan beri “Chiksereda” uchun to‘p surib kelmoqda. 31 yoshli futbolchi 2022\2023 yilgi mavsumda hozirgacha 13 ta o‘yinda maydonga tushgan va bir bor sariq kartochka bilan siylangan.

Darvoqe, Kelemen markaziy himoya pozisiyasida harakat qiladi.

Shuningdek, jamoaning yana bir muhim futbolchilaridan biri 30 yoshli hujumkor o‘yinchi Loran Kovach. U ham vengriyalik hisoblanadi va hozirgacha 16 ta bellashuvda 7 ta gol urgan holda jamoasining to‘purari bo‘lib turibdi. Aytishlaricha, uning chap oyoqda beradigan zarbalari kuchli. Aynan ushbu futbolchi “Chiksereda”ning eng qimmat o‘yinchisi sanaladi. Transfermarkt portalida uning bahosi 200 ming yevro.

“Chiksereda” tarkibida ko‘plab legionerlar bor va ularning aksariyati Vengriyadan. Shuningdek, Ispaniya, Marokash, Sloveniya, Misr, Slovakiya, Italiyadan kelgan legionerlar ham bor. Jamoaning o‘rtacha yoshi esa 23,8 ni tashkil qilmoqda.

Eslatib o‘tamiz, “Andijon” hamda “Chiksereda” jamoalari o‘rtasidagi uchrashuv bugun (31 yanvar) Belekda mahalliy vaqt bilan soat 16:30 da boshlanadi. Toshkent vaqtiga esa 18:30 ga to‘g‘ri keladi.

"Andijon" matbuot xizmati.