«Chelsi»da «9» raqamiga qarg‘ish tekkanmi? Har holda, hozirgi asr boshidan buyon jamoada shu raqamni olgan deyarli barcha futbolchilar omadsizlikka yo‘liqishgan.
2022 yilning yozida «Chelsi»ning 9-raqamli formasi egasiz qoldi: Romelu Lukaku omadsiz mavsum (44ta o‘yinda atigi 15ta gol)dan so‘ng «Inter»ga qaytishni ma’qul ko‘rdi. Shundan so‘ng belgiyalikdan bo‘shagan raqamni hech kim olishni xohlamadi. Quyidagi tahliliy maqola shu haqda.
Jamoaning sobiq bosh murabbiyi Tomas Tuxel hattoki, bu borada bayonot ham bergandi: «Odamlarning aytishlaricha, «Chelsi»da «9» la’natlangan ekan. Qisqasi, bu raqamni qaysidir yangi futbolchi uchun saqlayotganimiz yo‘q, shunchaki, unga talabgor chiqmadi. Futbolchilar ba’zan o‘z raqamlarini o‘zgartirishni istashadi, lekin ajablanarli tomoni, «9» bu yerda hech kimga kerak emas. Klubda mendan ko‘proq vaqt o‘tkazganlar tez-tez takrorlashadi: «Falon hujumchi «9»ni olgandi, ishlari butunlay orqaga ketdi, gol urolmadi». Xullas, hozirgi holatda klubda hech kim bu raqam ostida o‘ynashni istamaydi...».
Keyinchalik Pyer-Emerik Obameyang «9»ni olishga jazm etganida, Tuxel gabonlik hujumchini jasur yigit sifatida maqtadi: «Pyer-Emerik 9-raqamli futbolkani oldimi, demak, u yetarli darajada jasur va qo‘rqmas. Har holda, o‘tmishdan cho‘chimadi, klubda bu raqam nimani anglatishiga parvo qilmadi. Asosiysi, Obameyang № 9da o‘z tarixini yozishga tayyor. Auba bunday chorlovdan xursand». Amalda esa «Barselona»dagi samarali yarim mavsum (13ta gol)dan keyin Angliyaga qaytgan gabonlik to‘purar atigi 3ta gol urdi. Shu tariqa «Chelsi»da «9»ga qarg‘ish tekkani haqidagi gap-so‘zlar yana avj oldi. Nima, hammasi chindan ham, shu qadar yomonmi? Agar statistika bo‘yicha xulosa chiqarsak, shunday... «Chelsi»da «9» ostida binoyidek natija qayd etgan oxirgi futbolchi - bu Jimmi Floyd Xasselbaynk. U qatorasiga 2 mavsum 25ta gol marrasidan oshgandi.
Niderlandiyalik futbolchidan keyin klub samarali «to‘qqiz» topish yo‘lida ko‘p pul sarfladi. Raqamlarda aytsak, 2004 yildan buyon 315,5 million yevro! Lekin bu davrda 9-raqamda eng yaxshi natijani tekinga tushgan Temmi Abraxam qayd etdi. Maqolaga ilova qilingan 1-tasvirga qarab, 9-raqam egalari qanday karomat ko‘rsatishganini baholab chiqish mumkin. O‘z o‘rnida muhim tushuntirish: statistik ma’lumotlar faqat 9-raqam ostidagi o‘yinlarga asoslangan. Deylik, argentinalik Ernan Krespo «Chelsi»da 21-raqam ostida ham to‘p surgan (mavsum-2003|2004da), Romelu Lukaku London klubidagi faoliyatini «18» ostida boshlagan, Alvaro Morata esa 2018 yilning yozida egizak farzandlari tug‘ilgani munosabati bilan «9» oldiga «2»ni qo‘shib, 29-raqamni olgan.
** Xasselbaynk davri (mavsum-2000|2001)dan buyon «Chelsi» futbolchilari 3 marta APL «Oltin butsa»sini qo‘lga kiritishdi. Biroq laureatlar orasida «9» egasi yo‘q. «Chelsi» tarixidagi eng yaxshi to‘purar Frenk Lempard esa 8-raqam ostida o‘ynagan.
** Bu davrdagi 9-raqam sohiblari orasida eng sermahsul futbolchi - Temmi Abraxam (1ta o‘yinda o‘rtacha hisobda 0,37ta gol).
2002 yildan buyon «Chelsi»dagi 9-raqam egasi faqat bir marta 20ta gol marrasida oshgan - Fernando Torres (2012|2013). To‘g‘ri, ispaniyalik hujumchi bunday natijaga barcha turnirlar hisobidan erishgan (2-tasvirga qarang).
** O‘rtacha hisobda 3ta o‘yinda 1ta gol.
** Fernando Torres CHLda «Nordshelland» va «Shaxtyor» darvozasini ishg‘ol qilgan (guruhda «Yuventus» ham bor edi).
** APLda klassik «katta oltilik»ka mansub klublarga qarshi o‘yinlarda atigi 1ta gol («Arsenal» darvozasiga).
Bir qarashda, Obameyangda ham «qarg‘ish» kuchini kesish imkoniyati yo‘qdek. Taniqli jurnalist Pol Merson Sky Sports nashridagi ruknida bunga alohida to‘xtaldi: «Obameyang «Manchester Siti»ga qarshi birinchi o‘yinda zaxiradan maydonga tushganidan keyin qayta almashtirildi va endi jamoadan ketsa kerak, menimcha. Har holda, 30 yoshdan oshgan futbolchining bunday holatga jimgina qarab turishi qiyin». Umuman, Obameyangning «Barselona»ga qaytishni xohlayotgani haqida mish-mishlar bor: gabonlik «Chelsi»dagi holatidan norozi va Xavi qo‘l ostida yana yorqin o‘ynay olishiga ishonmoqda. Biroq Ispaniya klubida ehtiyoj bormi? Asosiy masala shu. Hujumchi «Chelsi»dagi dastlabki 15ta o‘yin (barcha musobaqalar hisobidan)da 2,8xG natijasini qayd etdi.
Aytgancha... Evropaning yana bir qator klublarida ma’lum raqam la’natlangan maqomiga ega:
«MYU»da № 7. Aslida «qizil iblislar»da 7-raqam uzoq vaqt afsonaviy sanalgan. Har holda, Jorj Best, Devid Bekxem, Erik Kantona va Krishtianu Ronaldu «7» obro‘sini mislsiz darajada ko‘tarishgan. Biroq 2011 yili Krish ketgach, bu raqam omadsizlik belgisiga aylandi. Shundan buyon 7 nafar futbolchi «7»da kutilgan karomatni ko‘rsata olmadi. Bular - Maykl Ouen, Anxel di Mariya, Memfis Depay, Aleksis Sanches, Edinson Kavani va Krishtianu Ronalduning o‘zi.
«Milan»da № 9. Filippo Inzagi 2012 yili jamoadan ketganidan buyon Aleshandre Pato, Alessandro Matri, Fernando Torres, Mattia Destro, Luis Adriano, Janluka Lapadula, Andre Silva, Gonsalo Iguain, Kshishtof Pyontek «9»ni olishdi, ammo... To‘g‘ri, hozir Olivye Jiru 9-raqamni qarg‘ishdan «tozalayotgandek».
«Barselona»da № 7. David Vilya «7»ning oxirgi omadli egasi. Pedro, Filippe Koutinyo, Arda Turon, Antuan Grizmannga esa ushbu raqam «og‘irlik» qildi, go‘yo. Usmon Dembele ham boshida rosa qiynaldi, Fransiyalik iqtidor 7-raqamni endi-endi «bo‘ysindirmoqda».
