Kecha Bekoboddagi «Metallurg» markaziy stadioni anjumanlar zalida klub rahbariyati va ishchi xodimlarining kengaytirilgan yig‘ilishi bo‘lib o‘tdi. Unda boshlanishiga sanoqli kunlar qolayotgan yangi mavsumga klubda tayyorgarlik jarayon jiddiy tahlil etildi.

Mamlakat milliy chempionati uchrashuvlarini qabul qiladigan «Metallurg» markaziy stadioni, yoshlar birinchiligi o‘yinlarini qabul qiladigan «Metallurg» stadioni, shuningdek, klub qoshida faoliyat yuritayotgan futbol akademiyasi jamoalari bahslari o‘tkazilishi kutilayotgan «Sementchi» stadioni, akademiya qarorgohidagi holat tanqidiy ko‘rib chiqildi.

Kiyinish, yuvinish xonalari, hakamlar, nazoratchi hakam, o‘yin komissari o‘tiradigan xonalar, VIP, SIP tribunalarini joriy ta’mirdan chiqarish, stadion yoritgichlarini mavsumning ilk turigacha belgilangan lyuksga yetkazish, ta’mirlash ishlarini sifatli yakunlash, bunda Bekobod shahrining o‘ziga xos iqlim sharoitini hisobga olish, stadionlar radiofikasiyasi tizimini mukammallashtirish, internet xizmati bilan sifatli ta’minlanishini nazorat etish kabi bir qator muhim topshiriqlar berildi. Har bitta yo‘nalish va tizimga javob beruvchi mas’ullar bilan jiddiy muloqot o‘tkazildi. Ularning zimmasidagi vazifalar qanchalik muhim va ahamiyatli ekanligi tushuntirildi. Klubning iqtisodiy hamda moliyaviy holatidan kelib chiqqan holda ishlarni tejamkorlik, shuning barobarida talablar darajasida bajarishga qat’iy amal qilinishi so‘raldi.

Klub rahbariyati mavsum arafasigacha bajariladigan yumush va ishlarni har kuni, doimiy ravishda nazorat etib borishini, mas’ullar ishga mas’uliyat bilan yondoshishlari zarurligi qayta va qayta ta’kidlandi. Har bitta ish rejali, maqsadli tarzda amalga oshirilishi kerakligi ta’kidlandi.

Klub boshqaruvi tizimidagi juz’iy o‘zgarishlar yig‘ilganlarga ma’lum qilindi va yangi lavozim egalari tanishtirib o‘tildi.