Pul sarflash borasida eng omadsiz klublar ma’lum qilindi. Ro‘yxatda, shubhasiz, ingliz klublari yetakchilik qilmoqda. Kuchli o‘ntalikning to‘qqiztasi aynan APL a’zolari sanaladi. "CIES Football Observatory" tomonidan to‘plangan ma’lumotlar 2018-2019 yilgi mavsumlardan to hozirgacha bo‘lgan davrni o‘z ichiga oladi. Farq so‘nggi besh yilda sotib olish va sotish orasida yuzaga keltirilgan.
Umumiy hisob-kitob eng faol 100 ta klub bo‘yicha amalga oshirilgan bo‘lib, shulardan chorak qismi ingliz jamoalari sanaladi. Angliyaning faqat "Norvich" va "Uotford" klublarigina bu davr ichidan foyda bilan chiqqan. Qolganlar sotishdan topgan pullaridan ko‘ra, sotib olishga ko‘p mablag‘ sarflab yuborgan.
Manfiy nisbatda turgan jamoalar ichida yetakchi "Chelsi" sanaladi. Negaki, yangi boshliq Todd Byoli so‘nggi ikki oynada misli ko‘rilmagan xarajatlar qildi. Klub garchand oxirgi 5 yilning ikkitasidagi transferlar oynasidan foyda bilan chiqqan bo‘lsada, umumiy hisobda 665 million funtni ortiqcha sarflagan (-665 million).
Shuncha vaqt davomida musbat natijaga ega bo‘la olmagan "MYU" ro‘yxatning ikkinchi pog‘onasini band etib turibdi. "Qizil iblislar"ning transferlardan kelgan foydasi sarflangan pullarga qaraganda 595 million funtga kamdir (-595 million).
Kuchli uchlikni "Arsenal" yakunlab beradi. Bu jamoa besh yilda transferlar uchun 483 million funtni ortiqcha sarflagan. Shuningdek, ro‘yxat "Tottenxem", "Vest Xem", "Nyukasl" kabi jamoalar bilan davom ettiriladi. "Aston Villa" va "Vulverxempton"ni ham o‘sha ro‘yxatga qo‘shish mumkin. Kuchli o‘ntalikdagi yagona Angliyaniki bo‘lmagan klub bu "Yuventus" sanaladi. Ammo ayni damda bu jamoada kuchli moliyaviy bo‘hronlar yuz berib turibdi. 10 o‘rinni "Liverpul" egallagan va bu jamoaning ham ishlari shu kunlarda joyida emas.
Ro‘yxatning narigi oxiriga yuzlansangiz, mutlaqo o‘zgacha hikoyaga guvoh bo‘lasiz. Ingliz klublari ichida faqat "Uotford"gina musbat natijaga ega va foyda bilan chiqqan klublarning kuchli yigirmataligida 17 o‘rinni band etgan. Plyus natijaning eng cho‘qqisida "Benfika" qayd etiladi. Bu klub besh yil davomida sotib olgan va sotgan futbolchilari orasida 329 million funt foyda ko‘rdi (+329 million). Lissabonliklar APLga Ruben Diash, Darvin Nunyes va Enso Fernandes kabi super-yulduzlarini "hadya etgandi". Undan keyingi o‘rinlarni "Lill" (+274 million) va "Ayaks" (+259 million) egallaydi.
ISMATOV J.
