"Nasaf"ga qarshi o‘yinda kuchli zarba bilan "Andijon"ga g‘alaba keltiruvchi gol muallifiga aylangan Sardor Abdunabiyev o‘z taassurotlari bilan o‘rtoqlashdi.

— Bunday o‘yin haqida nimalarni aytgan bo‘lardingiz?
— O‘yinni hamma og‘ir bo‘lishini bilardi. Ammo shu bilan birga g‘alaba qozonishimizga ham ishongandik. Muxlislarimizning qo‘llab-quvvatlashi ham bizga dalda bo‘ldi. Mavsumni bunday ajoyib g‘alaba bilan boshlash yoqimli.

— O‘sha vaziyatda uzoqdan zarba berganingizda gol bo‘lishini kutganmidingiz?
— Zaxiradan maydonga tushayotganimda bosh murabbiyimiz menga tegishli ko‘rsatmalarni berdi. Albatta, senda ham vaziyating bo‘ladi, yaxshilab harakat qil, senga ishonaman, degan gaplarni aytdi. Menga gol urasan, deb aytdi. Haqiqatan menda bitta imkoniyat bo‘ldi va bundan foydalandim. Bu g‘alabamizni bosh murabbiyimiz Aleksandr Andreevich Xomyakovning tug‘ilgan kuniga bag‘ishlaymiz. Bizga ishonch bildirgan barchadan minnatdormiz.

— Darvozabon oldinga chiqib ketganini sezgandingiz-a?
— Menga pas uzatilganida qarshimda bir o‘yinchi bor edi va boshqa variantim ham yo‘q edi. Ya’ni, to‘g‘ri darvoza tomon tepishim kerakligini his qildim va zarba berdim, gol bo‘ldi.

— G‘alabani kutganmidingiz?
— Nafaqat men, balki butun jamoa ham g‘alaba qozonishimizni kutgandi va sezgandi. Buning uchun barchamiz maydonda astoydil harakat qilishimiz kerak edi. Biz uchun tarix yaratishimiz ham muhim edi.

— Bu faoliyatingizdagi eng chiroyli gol bo‘ldimi?
— Albatta, “Nasaf” darvozasiga urgan golim faoliyatimdagi eng chiroylisi bo‘ldi.

“Andijon” matbuot xizmati.