«PSJ» goleadori zilziladan jabr chekkan bolalarga yordam berish uchun tuzilgan jamg‘arma aksiyasiga qo‘shildi. Bu tashabbus ayni kunlarda butun dunyo bo‘ylab keng tarqalmoqda.

Fevral oyida Turkiya va Suriyada ro‘y bergan +7 ballik zilzila 45 mingdan ortiq kishini hayotdan olib ketdi, yana 100 minglab odam boshpanasiz qoldi. Hozirda har ikki mamlakatda gumanitar falokat oqibatlarini bartaraf etish ishlari davom etmoqda. Jumladan, Turkiya futbol federasiyasi dunyo­ning eng mashhur sportchilarini birlashtirgan OmuzOmuza («Elkama-elka») aksiyasini boshlab yubordi.

«PSJ» hujumchisi Kilian Mbappe esa birinchilar qatorida ushbu tashabbusni qo‘llab-quvvatladi, unga qo‘shilishini ma’lum qildi.

«Chindan ham, hammani larzaga solgan katta falokat yuz berdi, - dedi fransiyalik futbolchi beIN SPORTS Turkiye efirida. - Inson xayoliga sig‘maydigan darajadagi katta fojia. Turklar qanday ko‘rgilikka yuz tutishganini baholash juda qiyin. Bugungi vazifa men uchun favqulodda muhim ahamiyat kasb etadi. Turkiyani qo‘llab-quvvatlash uchun butun jahon futbol jamoatchiligi ham birlashishi kerak. Shunday aksiya juda zarur edi va uning bir qismiga aylanishdan faxrlanaman. Jabrdiyda bolalarga yordam qo‘lini cho‘zish uchun bor imkoniyatlar va vositalarni ishga solaman. Inson sifatida hamisha yordam berish, Turkiyaga qandaydir naf keltirish uchun qo‘ldan kelganicha harakat qilaman. Umidvormanki, mamlakatda hammasi yaqin orada o‘z iziga tushadi va turk bolalarini yuzida yana tabassum ko‘ramiz».

OmuzOmuza aksiyasiga Kilian Mbappedan tashqari, Elif Elmaz, Neymar, Jorje Jezush, Fotih Terim kabi mashhur futbol kishilari qo‘shilishdi. «PSJ» hujumchisi Lionel Messi esa Turkiyaga o‘z jamg‘armasi orqali insonparvarlik yordami yubordi.