Xabaringiz bor, “Andijon” jamoasi dastlabki 3 ta turdan keyin 1 g‘alaba va 2 mag‘lubiyat qayd etdi. Ayni chog‘da futbolchilarimiz Dukentda “Olimpik” klubiga qarshi bo‘ladigan bellashuvga tayyorlanishmoqda.

Mazkur bahs Superliganing 4-tur doirasida 3 aprel kuni Toshkentda bo‘lib o‘tadi.
Jamoa sardori va yetakchisi Ildar Mamatkazin esa bo‘lajak o‘yin va tayyorgarlik borasida gapirdi.  

-  “Andijon” jamoasini oldinda Toshkentda “Olimpik” klubiga qarshi uchrashuv kutib turibdi. Avvalo bo‘lajak raqib haqida nima degan bo‘lardingiz?

-  22 mart kunidan Dukentda to‘plandik va bo‘lajak “Olimpik” jamoasiga qarshi uchrashuvga tayyorgalikni boshlaganmiz. Kuniga ikki mahaldan mashg‘ulot olib boryapmiz. O‘rtoqlik o‘yini ham rejalashtirilgan. “Olimpik” klubiga keladigan  bo‘lsak, o‘zining falsafasiga ega jamoa. Asosan O‘zbekiston olimpiya terma jamoasining negizi xisoblanadi. Yaxshi shakllangan jamoa, tartibli va chiroyli o‘yin ko‘rsatadi. Buni natijalari ko‘rsatib turibdi. Lekin biz asosiy e’tiborimizni ushbu uchrashuvga qaratganmiz va jiddiy tayyorgarlik ko‘ryapmiz.

-  Tabiiyki, mahalliy muxlislar sevimli jamoasidan ijobiy natija kutayotgani sir emas. O‘yinga tayyorgarlik hamda jamoaning kayfiyati qanday?

-  Avvalo futbol muxlislarimizdan qoniqarsiz natijalar uchun jamoa nomidan uzr so‘ramoqchiman. Bizning jonkuyar ishqibozlarimiz bunday natijaga loyiq emaslar. Ular hamma vaqt eng yaxshisiga munosib. To‘g‘risini aytsam, biz futbolchilar mag‘lubiyatdan keyin biroz tushkunlikda yurdik. Hozir esa hamma narsani unutib keyingi o‘yinlarga tayyorgarlik ko‘ryapmiz. Bizni oldinda qiyin uchrashuvlar kutib turibdi. Bo‘lajak bahslarda muxlislarimizni xursand qilishimiz kerak va shart! Jamoada hamma ushbu mas’uliyatni to‘liq tushunib turibdi va o‘yinlarga jiddiy tayyorgarlik qilyapmiz. Biz ham barchaning oldida yuzimiz yorug‘ bo‘lishini xohlaymiz va Xudo xohlasa shunday ham bo‘ladi. Ayni paytda bizga muxlislarimizning ishonchi va daldasi juda muhim.

“Andijon” matbuot xizmati.