Italiya chempionatining joriy mavsumida kuchli to‘rtlikka kirish uchun harakat qilayotgan «Atalanta» bugun o‘z maydonida «Spesiya»ni qabul qilib, juda qiyin g‘alabaga erishdi.

Bahsning 18-daqiqasida mehmonlar hisobni ochishdi. Shomurodov boshlab bergan hujumni jamoadoshi davom ettirdi hamda Gyasiy yakkama-yakka vaziyatda darvozani ishg‘ol qildi.

Uchrashuving 32-daqiqasida esa bergamoliklar hisobni tenglashtirishdi. De Ron tomonidan yo‘llangan zarbani "Spesiya" posboni qaytara olmadi.

"Atalanta" ikkinchi bo‘limning dastlabki 10 daqiqasini juda kuchli o‘tkazdi va ikkita gol urishga muvaffaq bo‘ldi.

Bahsning 64-daqiqasida esa Shomurodovning sa’y-harakatlari evaziga "Spesiya"ga ikkinchi golni urdi: hamyurtimiz raqibdan to‘pni olib qo‘ydi hamda chap qanotdan oldinga o‘tib, jarima maydoniga kirayotgan jamoadoshiga uzatma berdi. Burabiya aniq zarba bilan darvozani zabt etdi.

Shundan so‘ng tashabbus "Spesiya" tomoniga o‘tdi. Jamoa hisobni tenglashtirishga juda yaqin keldi. Bir vaziyatda to‘p to‘singa tegib qaytdi.

"Atalanta" ushbu g‘alaba tufayli o‘z ochkolarini 58taga yetkazib, vaqtinchalik bo‘lsa-da jadvalda 4-o‘ringa ko‘tarildi. "Spesiya" esa 27 ochko bilan 17-pog‘onada qoldi.

Italiya chempionati, 33-tur
Atalanta – Spesiya 3:2 (1:1)
Gollar: 0:1 – 18 Gyasiy, 1:1 – 32 de Ron, 2:1 – 48 Dzappakosta, 3:1 – 54 Muriel, 3:2 – 64 Burabiya.
Atalanta – Musso, Dzappakosta, Toloi, Djimshiti, Skalvini (Palomino, 67; Demiral, 83), Mele (Soppi, 90), de Ron, Pashalich (Ederson, 67), Kopmeyners, Sapata, Muriel (Boga, 67).
Spesiya – Drongovski, Amyan (Ferrer, 66), Nikolau, Visnevski, Resa, Ampadu (Ekdal, 57), Bastoni (Espozito, 57), Burabiya (Verde, 83), Agudelo (Krollis, 83), Gyasiy, Shomurodov.
Ogohlantirishlar: Ampadu (38), Bastoni (40), Agudelo (75).