Italiya A Seriyasining 33-turida “Napoli” “Udineze” bilan durang o‘ynadi va muddatidan oldin mamlakat chempionligini qo‘lga kiritdi.

“Napoli”ning chempionligini nishonlashi vaqtida yuzlab odamlar jarohatlandi. La Gazzetta dello Sport nashrining xabariga ko‘ra, Skudettoni nishonlash oqshomidan so‘ng 203 kishi turli jarohatlar bilan shifoxonalarga yotqizilgan.

4 nafar kishi o‘qdan jarohat olgan. Bundan tashqari pichoqdan jarohatlanish, feerverkdan kuyishlar, oyoq-qo‘llar va burun sinishi, ko‘zlarga feyerverklar va petardalarning portlashi natijasida shikast yetishi, yiqilishlar natijasida ko‘karish, astmatik holatlar kuzatilgan. Bir kishi kokain dozasining haddan oshib ketishi tufayli shifoxonaga yotqizilgan.

Undan tashqari o‘qdan jarohat olgan 26 yoshli yigit tunda shifoxonada vafot etgan. Biroq mutasaddilar bu chempionlikni nishonlash vaqtida bo‘lmaganini ta’kidlamoqda.  

Eslatib o‘tamiz, Neapol klubi 33 yil ichida ilk bor Skudettoni qo‘lga kiritdi.