"Manchester Siti" yarim himoyachisi Bernardu Silva Chempionlar ligasi tarixida "Real"ga qarshi yarim finalda dubl qayd etgan uchinchi futbolchiga aylandi. Undan oldin bu ishni faqat Lionel Messi (2011 yilda) va Robert Levandovski (2013) amalga oshirgan. Bu haqda Opta Sports xabar bermoqda.
Bir necha daqiqa oldin Chempionlar ligasi 1/2 finalining javob uchrashuvi yakuniga yetdi va unda “Manchester Siti” o‘z maydonida “Real”ni 4:0 hisobida mag‘lub etib, turnir finaliga yo‘llanma oldi. Birinchi bo‘limda "Siti"ning portugaliyalik vingeri Bernardu Silva dubl qayd etgan bo‘lsa, ikkinchi bo‘limda Eder Militaoning avtogoli hisobni yiriklashtirdi va Xulian Alvares final hushtagiga yaqin o‘yinga so‘nggi nuqtani qo‘ydi. 9 may kuni Madridda bo‘lib o‘tgan birinchi o‘yinda ham kuchli aniqlanmagandi. Uchrashuv durang bilan yakunlandi - 1:1.
Finalda “Manchester Siti” Milanning “Inter” klubiga qarshi maydonga tushadi.
