APLning an’anaviy kuchli oltilik jamoalari doimo bir-biriga qarshi kurashadi. Ular kuchli to‘rtlik va chempionlik uchun jangga kiradi. Joriy mavsum ham bundan mustasno emas. 2022-23 yil davomida biz APLning bor tarovatidan bahramand bo‘ldik va bu bizga katta taassurotlarni ulashdi. Bunda kuchli oltilik jamoalarining ta’siri katta edi. Tan olish kerakki, bu mavsum qolganlariga qaraganda boshqacharoq kechdi. O‘zining qimmat tarkibi va boyligi bilan maqtanadigan jamoalarning ayrimlari yetakchi o‘rinlarga erisha olmadi. Bizda yillar davomida shakllangan "Manchester Siti", "MYU", "Liverpul", "Chelsi", "Arsenal" va "Tottenxem" tartibi buzilib ketdi.

"Nyukasl Yunayted" mavsumni kuchli to‘rtlikda yakunlab, YECHLga so‘nggi 20 yilda ilk bor yo‘l oldi. Aytish mumkinki, klub egalari kiritgan sarmoya yaqin yillarda bu jamoani top darajaga olib chiqadi. Mavsumning yana bir kashfiyoti bu "Brayton" edi. "Chag‘alaylar" o‘z darajasidan ham yuqoriga sakray oldi va kuchli jamoalar bo‘lmish "MYU", "Arsenal", "Chelsi" va "Liverpul"ni munosib tarzda mag‘lub etdi. Bu natijalar klubni 6 o‘ringa olib chiqib, YELga yo‘llanmani taqdim etdi.
Yuqoridagi ikki klub inqiroz ko‘chasiga kirib qolgan "Chelsi" va "Tottenxem" o‘rnini egalladi deyish mumkin. Xususan, "Chelsi" APLdagi eng yomon natijasini qayd etib, turnir jadvalining pastki yarmida qolib ketgan bo‘lsa, "shporlar" yevrokuboklardan quruq qolish arafasida turibdi.

Qizig‘i joriy mavsumdagi kuchli oltilikning o‘zaro natijalari ham umumiy turnir jadvalini aks ettiradi. Unda ham xuddi amaldagi kabi "Manchester Siti" birinchi, "Arsenal" ikkinchi, "MYU" esa uchinchi pog‘onani band etgan. APL jadvalida "Liverpul" beshinchi raqamda qayd etilayotgan bo‘lsa, "Tottenxem" va "Chelsi"ning natijalari o‘ta yomonligi bilan ajralib turibdi. Masalan, "Chelsi" kuchli oltilik jamoalari bilan bahsda bitta ham o‘yinni yuta olmadi. Ularning "MYU"ga qarshi 4-1 hisobida tugagan bahsi, mavsumga mantiqiy nuqta qo‘ygandi.
Demak, quyida o‘zaro o‘yinlar natijalari bo‘yicha olti klub tartiblanadi.

1. "Manchester Siti" – 21 ochko

O‘yinlar: 10 ta
G‘alabalar: 7 ta
Duranglar: 0 ta
Mag‘lubiyatlar: 3 ta
Gollar: 24 ta
O‘tkazilgan gollar: 12 ta
Gollar farqi: +12

2. "Arsenal" – 19 ochko

O‘yinlar: 10 ta
G‘alabalar: 6 ta
Duranglar: 1 ta
Mag‘lubiyatlar: 3 ta
Gollar: 20 ta
O‘tkazilgan gollar: 18 ta
Gollar farqi: +2

3. "MYU" – 17 ochko

O‘yinlar: 10 ta
G‘alabalar: 5 ta
Duranglar: 2 ta
Mag‘lubiyatlar: 3 ta
Gollar: 21 ta
O‘tkazilgan gollar: 23 ta
Gollar farqi: -2

4. "Liverpul"– 15 ochko

O‘yinlar: 10 ta
G‘alabalar: 4 ta
Duranglar: 3 ta
Mag‘lubiyatlar: 3 ta
Gollar: 20 ta
O‘tkazilgan gollar: 14 ta
Gollar farqi: +6 ta

5. "Tottenxem" – 8 ochko

O‘yinlar: 10 ta
G‘alabalar: 2 ta
Duranglar: 2 ta
Mag‘lubiyatlar: 6 ta
Gollar: 14 ta
O‘tkazilgan gollar: 21 ta
Gollar farqi: -7

6. "Chelsi" – 4 ochko

O‘yinlar: 10 ta
G‘alabalar: 0 ta
Duranglar: 4 ta
Mag‘lubiyatlar: 6 ta
Gollar: 5 ta
O‘tkazilgan gollar: 15 ta
Gollar farqi: -10

ISMATOV J.