“Metallurg” futbol akademiyasi tarbiyalanuvchilarining San Sebastyandagi xalqaro turnirdagi ishtiroki bois Ispaniya matbuoti O‘zbekiston haqida, Bekobod futbol klubi haqida atroflicha ma’lumotlar bermoqda. Xususan, bugun “Golsmedia” nashri “Metallurg” futbol akademiyasida faoliyat olib borayotgan Pablo Bayesa bilan bir sahifalik intervyu tashkil qildi.

Xitoy Xalq Respublikasidagi faoliyatidan so‘ng O‘zbekistonga ko‘chib o‘tgan Pablo Bayesa sayt muxbirining savollariga batafsil javob qaytarar ekan, O‘zbekiston haqida, sanoat shahri Bekobod futboli haqida juda iliq fikrlarini bayon etgan. Jumladan, u “Metallurg” klubi qoshida ochilgan futbol akademiyasidagi sharoitlar, tizim, ish qurilishi unga manzur bo‘lganligini ta’kidlagan. O‘zbekistonda iqtidorli yoshlar ko‘pchilikni tashkil etishini, ularning eng iste’dodlilari esa “Metallurg” futbol akademiyasida jamlanganini, tez orada Superligada ishtirok etayotgan bosh jamoada o‘ziga xos o‘yin uslubiga ega iqtidorli yoshlar to‘p surishini va bu klub elitaning yetakchi jamoalaridan biriga aylanishini qayd etgan.