Xabaringiz bor, bu yil chempionatimiz o‘tgan yilgidan-da shiddatli va kurashlarga boy jangovar ruhda davom etmoqda. Sababi quyi o‘rinlardagi jamoalar ham chempionlikka kurashayotgan klublardan qo‘rqmasdan yetarlicha jang taklif qilishayotgani…

Buning natijasi o‘laroq, chempionlik intrigasi shiddatli tarzda davom etmoqda. Buni turnir jadvalini ko‘rgan har qanday odam bilib olishi mumkin. Bugun esa bizni yil o‘yini kutib turibdi.
 
"Navbahor" muxlislari qarshisida asosiy raqiblaridan biri bo‘lmish "Paxtakor"ni qabul qiladi. Birinchi davrada poytaxtliklarga mag‘lub bo‘lgannini hisobga olsak, bugun jamoa nafaqat revansh olish uchun maydonga chiqadi, balki chempionlik poygasida sherlardan 5 ochko farq bilan o‘zib ketishi mumkin. Bu esa OCHL saralash o‘yinlari oldidan “Navbahor” muxlislarini bir oz bo‘lsada xotirjam qilishi aniq.
 
“Qo‘rqinchli avgust” oyini boshidan o‘tkazayotgan "Paxtakor" O‘zbekiston kubogida "Dinamo" tomonidan chiqarib yuborilgan bo‘lsa, o‘tgan turda asosiy raqiblaridan biri "Neftchi"ga kichik hisobda imkoniyatni boy berib qo‘ydi. Bu esa jamoa bugungi uchrashuvga alamzada holda yetib kelganini anglatadi.

Maksim Shaskix shogirdlari chempionlik uchun kurashda karvonboshi bo‘lib olishi uchun bugun Namanganda lochinlarni mag‘lub etishi kerak, axir hali oldinda "Nasaf" ham kutib turibdi.
 
Xullas, bugungi uchrashuvni bemalol final uchrashuvlariga tenglashtirish mumkin. Olti ochkolik o‘yinda xar ikki jamoa bor kuchini maydonga tashlab chiqsagina ega chiqadi.

Bugun maydonni har bir qarich yeri uchun kurash bo‘ladi, sababi bunday o‘yinlarda kam xato qilgan va kichik imkoniyatdan foydalangan jamoa g‘alaba qozonadi.

Bu esa Namanganda o‘tgan so‘nggi besh superliga bellashuvi natijalari:
 
2022 "Navbahor" — "Paxtakor" 1:1
2021 "Navbahor" — "Paxtakor" 1:2
2020 "Navbahor" — "Paxtakor" 1:1
2019 "Navbahor" — "Paxtakor" 0:1
2018 "Navbaho"r — "Paxtakor" 3:3
 
“Navbahor” uyida besh o‘yindir-ki g‘alaba qozona olmayabdi.

Gapirsa, gap ko‘p. Keling, yaxshisi bugun soat 20:00 da barchasiga javobni jonli ravishda “Sport tv” orqali bilib olamiz.

O‘tkazib yubormang, sharhida kamina va Orif Tolipov.

Xayrulla Hamidov.