“Metallurg” va “So‘g‘diyona” jamoalari bugungacha kuchlilar safida o‘zaro 43 ta o‘yin o‘tkazgan: 18 ta uchrashuvda jizzaxliklar, 16 tasida bekobodliklar zafar quchgan. 9 ta uchrashuvda esa durang natija qayd etilgan. Kiritilgan va o‘tkazib yuborilgan to‘plar farqi – 60:55, “So‘g‘diyona” foydasiga.

Mazkur jamoalar o‘rtasida qayd etilgan eng yirik hisob – 4:0. “So‘g‘diyona” 2001 yilda o‘z maydonida ham, safarda ham bir martadan shunday hisobda zafar quchgan. Eng gollarga boy o‘yin 2014 yili Zominda kuzatilgan. Unda darvozalarga to‘qqizta to‘p kiritilgan – 5:4.

Ushbu jamoalarning Bekobodda o‘tkazilgan o‘yinlar nisbati “Metallurg” foydasiga: 13 g‘alaba, 3 durang, 5 mag‘lubiyat, to‘plar farqi – 31:21.

Bekoboddagi so‘nggi beshta uchrashuvda qayd etilgan natijalar:

18.09.2022 «Metallurg» - «So‘g‘diyona» 2:1
05.05.2021 «Metallurg» - «So‘g‘diyona» 0:2
12.07.2020 «Metallurg» - «So‘g‘diyona» 2:0
18.10.2019 «Metallurg» - «So‘g‘diyona» 0:1
21.04.2018 «Metallurg» - «So‘g‘diyona» 2:0

"So‘g‘diyona" haqida
“So‘g‘diyona” futbol klubiga 1970 yilda asos solingan. Jamoa 1990 yilgacha DSK, “Mehnat”, “Jizzax”, “Irrigator”, “Bo‘ston”, “Zvezda”, “Yoshlik” nomlari ostida musobaqalarda qatnashib kelgan. 1990 yildan “So‘g‘diyona” nomini olgan jamoa ikki marta sovrindor bo‘lgan: 1992 yil – bronza medali, 2020 yil – kumush medal. To‘rt marta jamoa kuchlilar safini tark etgan. Jamoaning bitta mavsumda eng ko‘p gol kiritgan o‘yinchisi Aleksey Jdanov – 18 ta gol (1998).

2022 yilda “So‘g‘diyona” birinchi marta xalqaro maydonda mamlakatimiz sharafini himoya etdi. OFK kubogida jizzaxliklar mintaqaviy finalga chiqishdi.

“So‘g‘diyona” kuchlilar safida bugungacha 813 ta uchrashuv o‘tkazgan: 280 ta g‘alaba, 165 ta durang, 368 ta mag‘lubiyat. Kiritilgan va o‘tkazib yuborilgan gollar nisbati: 1022:1285. Jamoaning milliy chempionatlarimizdagi eng yirik g‘alabasi – 10:0 (1992 yil –“Surxon”). Eng yirik mag‘lubiyati esa – 1:8 (2000 – “Do‘stlik”), 0:7 (1996 – “Navbahor”, 2009 – “Neftchi”, 2015 – “Lokomotiv”).