Madridning “Real” klubi Jud Bellingem bilan tuzilgan shartnomani juda foydali deb hisoblamoqda.

Angliyalik yarim himoyachi yozgi transfer oynasida Dortmundning "Borussiya"sidan Madrid klubiga o‘tgan edi. Kelishuv shartlariga ko‘ra, ispanlar 103+31 million yevro to‘lashlari kerak.

ESPN xabariga ko‘ra, "Real Madrid" Bellingemga sarmoya kiritishni allaqachon muvaffaqiyatli deb hisoblamoqda, chunki futbolchining jamoaga ta’siri va uzoq muddatli salohiyati juda yuqori. Klubning fikricha, Jud kelajakda Madridning haqiqiy yetakchisi bo‘ladi va uning transferiga sarflangan pullar nisbatan arzon.

Qayd etilishicha, Bellingemning hamkorlari va murabbiylari uning mavsum boshida ko‘rsatgan darajasidan hayratda qolishgan – ingliz o‘zining professionalligi va jismoniy holati bilan barchani hayratda qoldirgan. Klub manbalaridan biri Jud "o‘zini "Real Madrid"da 2 yildan beri o‘ynagandek his qilmoqda" dedi.

Shunga qaramay, madridliklar futbolchining yanada kuchliroq bo‘lishi mumkinligiga ishonmoqda.

20 yoshli futbolchi “Los-Blankos” safida 10 ta o‘yin o‘tkazib, 10 ta gol va 3 ta golli uzatmaga mualliflik qilgan.