"Nyukasl" hujumchisi Aleksandr Isak oktyabr oyida bo‘lib o‘tadigan Yevropa chempionati saralash bosqichi o‘yinlari oldidan Shvesiya terma jamoasini tark etdi.

Qayd etilishicha, forvard yakshanba kuni Angliya chempionatining “Vest Xem”ga qarshi o‘yinida olgan jarohati bilan yig‘inga kelgan. Shvesiya futbol federasiyasi matbuot xizmati bergan ma’lumotlarga ko‘ra, terma jamoa shifokorlari ko‘rigidan so‘ng Aleksandr Isak terma jamoada o‘ynay olmasligi aniq bo‘ldi.

24 yoshli forvard terma jamoa safida 42 ta o‘yin o‘tkazib, 10 ta gol urgan. Oktyabr oyidagi yig‘inda shvedlar Moldova bilan o‘rtoqlik uchrashuvidan tashqari Belgiya bilan ham saralash bahsida maydonga tushishadi.