"Tottenxem" muxlislari hozir juda ham xursand. Ularning suyuklilari 2023/24 yilgi mavsumni fantastik darajada boshladi. Ammo yozda juda kamchilik "shporlar"dan bunday narsalarni kutgandi. Negaki, bu jamoa o‘tgan mavsumni so‘nggi 14 yildagi eng yomon natija bilan tugatdi. Antonio Konte ishdan ketib, o‘rniga Kristian Stellini qoldi. Mavsum yakunlangach esa, Xarri Keyn jamoa bilan xayrlashib, "Bavariya"ga o‘tdi. Shuncha muammolarga qaramasdan, "Tottenxem"ning qaytishi juda tez ro‘y berdi. To‘g‘ri, bu jamoa liga kubogi turnirini erta tark etdi. Ammo Joze Mourinyodan keyin ilk bor bu klub Postekoglu davrida barqaror natijalar qayd etmoqda. Shunday bir paytda, ko‘pchilikda savol tug‘ilishi tabiiy – haqiqatdan ham "Tottenxem" Keynsiz yaxshiroq jamoaga aylandimi? Quyida shu savolga javob izlab ko‘ramiz.
Konte va Mourinyo davrida jamoa Keynga qanchalik bog‘liq edi?
"Tottenxem" rahbariyati 2019 yilda Pochettinoni ishdan bo‘shatayotganida ko‘p narsalarni bilmasdi. Argentinalik mutaxassis bilan klub o‘zining hujumkor uslubini ham yo‘qotdi. Jamoa uslubiyati Mourinyo, keyinchalik esa Kontening qarshi hujum falsafasi ostida qayta qurildi. Bu murabbiylar himoyaviy futbol tarafdorlari edi. Ammo himoyani birinchi o‘ringa qo‘yish naf bermadi. Masalan, Pochettinoning so‘nggi mavsumida "shporlar" 39 ta gol o‘tkazib yuborgan bo‘lsa, bu miqdor yildan-yilga faqat oshib bordi ( 4 yilda mos ravishda 47, 45, 40, 63). So‘nggi yildagi 63 ta gol bu dahshatli ko‘rsatkich. Vaholangki, xG bo‘yicha jamoa faqat 52 ta gol o‘tkazishi kerak bo‘lgan. Bu degani, yo‘q joydan gol qo‘yib yuborish kuchayib ketgan. Keyn o‘tgan mavsumda 30 ta gol urib, jamoani sakkizinchi o‘rinda saqlab qolgandi. "Tottenxem" kutilgan gollardan 12 ta kam urgan. Bu esa jamoaning vaziyatlarni qanchalik ko‘kka sovurganini anglatadi. Xullas, Keyni bor bo‘lsa ham, na Mourinyo, na Konte davrida klub yuksalmadi. Natija gapiradigan joylarda "shporlar"ning omadi kulmayapti...
Keyn ketganidan beri Postekoglu jamoani qay darajada o‘zgartirdi?
Postekoglu qo‘lida jamoaning har bir qarichi isloh qilindi desak, mubolag‘a bo‘lmaydi. Hozir ularda yangi darvozabon bor. Gulyelmo Vikario, harxolda o‘z darvozasini o‘zi ishg‘ol qilmaydi. Masalan, o‘tgan mavsumda Lyoris xatolari sababli "Tottenxem" 4 ta gol o‘tkazib yuborgan.
Eng katta o‘zgarish qanotlarda qilindi. Kontening uslubidan farqli ravishda hozir ikki qanot himoyachilar bo‘lmish Destini Udoji va Pedro Porrolar asosan maydon markazi va hujum chizig‘ida paydo bo‘lmoqda. Bu narsa hujumkor futbolchilarga kattaroq hududlar ochishda qo‘l keladi. Masalan, mana shu omil sababli Bissuma va Meddisonlar hujumchilarga to‘plarni yanada aniq yetkazib berish imkoniga ega bo‘ldi. Pap Matar Sarrning raqib jarima maydonida paydo bo‘lishi esa qarshi tomon himoyasida tartibsizlik keltirib chiqarishda yordam beradi. Natijada, umumjamoa yana gol urishni "o‘rganib oldi". Oldingi yillarda gol borasida faqatgina Keyn va Songa suyanilar edi xolos. Hozir maydon markazida oldinlari Son va Keyn yaratadigan vaziyatlar Meddison tomonidan amalga oshirilmoqda. Shu sababli, "Tottenxem" yana APLdagi eng xavfli jamoalardan biriga aylandi. Bekorga yetakchilik shu jamoaning qo‘lida emas. Postekoglu nima qilishni yaxshi biladi.
ISMATOV J.
