OKMKning mag‘lubiyati shunchaki dahshatli. OKMKni oqlamoqchi emasman. Lekin¸ bu mag‘lubiyatning aybini yarmidan ko‘pini OFK o‘z bo‘yniga olsa ham bo‘ladi. Ayniqsa, yuridik bo‘lim. Tushunamiz yuridik bo‘limda futbolga aloqador insonlar emas, yuristlar o‘tirishadi. Ular futbolchi charchab, horib futbol o‘ynay olmasligini tushunishmaydi. Ular qaror chiqarishadi tamom.

Lekin¸ futbol o‘ynagan insonlar, futbolni ichidagilar biladi — futbolchilar uchun OKMK bosib o‘tgan yo‘l bu shunchaki dahshat. O‘yinga yetib borguncha dam olib, kuch yig‘ish o‘rniga, vaqtini yo‘lda o‘tkazgan jamoadan boshqa narsa kutish mumkin ham emas edi. Faraz qilyapsizmi, o‘yindan bir kun oldingi rasmiy mashg‘ulot ham o‘tkazilmagan. Murabbiylar rasmiy mashg‘ulotni 15 daqiqa ko‘proq o‘tkazish uchun qancha janjal qilishadi, bu yerda esa umuman mashg‘ulot yo‘q.

Kimdir aytishi mumkin: "G‘urur bormi o‘lguncha o‘ynamaysanlarmi?" deb, lekin ishoning, oyoqlaringiz sizga bo‘ysunmaganda, hech narsa qila olmaysiz. O‘yin vaqti futbolchining tomir urishi 200 dan yuqoriga chiqadi. Shu tempda o‘ynab berishi uchun murabbiylar futbolchini bir hafta oldin o‘yinga tayyorlashni boshlaydi. Solishtirish uchun oddiy insonni tomir urushi 70 dan 100 gacha bo‘ladi. Kecha OKMKda esa shu narsa yo‘l sabab ishdan chiqib bo‘ldi. Qayerdadir yugurmaydi, qayerdadir ulgurmaydi, qayerdadir yetib bora olmaydi. LCHda esa bunday xatolar kechirilmaydi. OKMKni "tupik"ka tiqib qo‘ygan OFK futbolni ko‘tarmoqchi bo‘lsa, futbolga bo‘lgan munosabatini o‘zgartirishi kerak. Shu o‘yinni bir kun keyin qilsa ham bo‘lar edi, masalan.

Aytgancha, yaqinda O‘zbekiston terma jamoasi ham Turkmanistonda Jahon chempionati saralash o‘yinini o‘tkazadi. Kecha "Paxtakor" shu maydonda mashg‘ulot o‘tkazdi. Maydon shunchaki dahshat. Tushunishingiz uchun misol keltiraman. O‘rtoqlaringiz bilan futbol o‘ynamoqchi bo‘lsangiz bo‘sh bo‘lgan duch kelgan bo‘sh sun’iy maydonni gaplashib futbol o‘ynaysizlar-ku. Terma jamoa o‘ynaydigan maydon xuddi shunday maydon. Bu maydonni qanday qabul qilish mumkin edi, tushunarsiz.

Terma jamoasi Jahon chempionati saralashida o‘ynaydigan jamoa normal maydon qila olmas ekan, nimaga kerak unda saralashda o‘yin o‘ynab?

Avvalo munosabatni o‘zgartirishimiz kerak. Keyin boshqalardan ham shularni talab qilishimiz kerak.

Har holda terma jamoa o‘yinlarni bu millat jamoasidir. Ularni bunday maydonda futbol o‘ynashga majburlash bu futbolni ustidan kulishdan boshqa narsa emas.

Ravshan Salimov.