"Al Ayn" safarda "Al Fayha"ni 3:2 hisobida mag‘lub etdi va nimchorak final masalasini 4-turdan keyin hal qilgan ikkinchi jamoaga aylandi.
Bugun Sharq mintaqasida Yaponiyaning "Kavasaki Frontale" jamoasi ham Sergeevning "Patum Yunayted" jamoasini mag‘lub etgan holda, 4 o‘yinda 12 ochko bilan keyingi bosqichga yo‘l olgan edi.
O‘zbek jamoalari orasida guruhdan chiqish uchun eng yaxshi imkoniyat - "Navbahor"da bo‘lib turibdi. Namanganliklar ikkita o‘yinda hech bo‘lmaganda 1 ochko jamg‘arishsa, keyingi bosqich masalasini rasman hal qilishadi. Qolgan guruhdagi natijalardan kelib chiqqan holda, "Navbahor" hozirgi 10 ochkosi bilan ham guruhdan chiqishi mumkin. Lekin, jamoamiz 28 noyabr kuni "Al Hilal"ga qarshi guruh g‘olibligi uchun o‘yinda faqatgina g‘alaba uchun maydonga tushishiga hech qanday shubha yo‘q.
"Nasaf" keyingi turda, o‘z maydonida "Al Faysali"ni mag‘lub etgan taqdirda, guruhdan chiqish masalasini deyarli hal qilgan bo‘ladi. "Paxtakor"da ham guruhdan chiqish uchun minimal imkoniyat saqlanib qolmoqda. Buning uchun vakillarimiz safarda, nimchorak final masalasini hal qilgan "Al Ayn"ning optimal bo‘lmagan tarkibini va o‘z uyida "Al Fayha"ni mag‘lub etishi zarur bo‘ladi. "Paxtakor" yana 6 ochko jamg‘argan taqdirda ham, qolgan guruhlardagi 2-o‘rin sohiblarining natijalarini kutishga majbur bo‘ladi.
