Superligasining 24-turidan o‘rin olgan “Navbahor” – “Bunyodkor” (3:0) uchrashuvidan keyingi matbuot anjumanining birinchi qismida mehmonlar bosh murabbiyi Aleksandr Kristinin ishtirok etib, jurnalistlarning savollariga javob berdi. “Qaldirg‘ochlar” ustozi odatdagidek, o‘z so‘zini o‘yin haqidagi fikrlari bilan boshladi.

- Barchaga xayrli kech! Avvalo, “Navbahor” va jamoa muxlislarini g‘alaba bilan tabriklayman. O‘yin qiyin o‘tdi, chunki raqib kuchli futbolchilardan tashkil topgan jamoa hisoblanadi. Hujumdagi o‘yinimiz biroz o‘xshamadi. Vaziyatlar bo‘ldi, ammo ulardan foydalana olmadik.

- Bugun shogirdlaringiz yaxshi taassurot qoldirib, himoyaga yotib olishmadi va futbol o‘ynashga harakat qilishdi. Jamoangizga hujumlarni yakunlashda nima yetishmadi, deb o‘ylaysiz?

- Nega bunday bo‘lganini tahlil qilish lozim, mantiqan noto‘g‘ri qarorlar qabul qilindi. Hammasini ko‘rib chiqamiz.

- Jamoadagi futbolchilardan ko‘nglingiz to‘lyaptimi?

- Men kimnidir yaxshi yoki yomon deya olmayman. Hozir tarkibda kim bo‘lsa, ular bilan ishlayapmiz. Yigitlar imkoni boricha harakat qilishmoqda. Biror futbolchini yaxshi yoki yomon o‘ynayapti, demayman. 

- Superliganing ushbu mavsumdagi darajasi haqida nima deya olasiz?

- Birinchi davra haqida hech narsa deya olmayman, chunki sababini bilasiz. Chempionat darajasi yaxshi, mavsum juda qiziq o‘tmoqda.

- “Bunyodkor”ning ikkinchi davradagi eng yaxshi va eng yomon o‘yini qaysi bahslar bo‘ldi?

- Hali oldinda ikkita uchrashuv bor, eng yaxshisi yoki eng yomoni hali oldindadir.

- Kelasi mavsum ham sizni jamoada ko‘ramizmi?

- Bilmayman. Klub bilan shartnomam joriy mavsum yakunigacha tuzilgan. Buni klub rahbariyati hal qiladi.