Men avval agentlik haqida yozgandim, "o‘zim ham agent bo‘lib ishlaganman", deb aytdim. Shuning uchun bugungi o‘yinimiz oldidan yana shu mavzuga bog‘lab fikrlarimni o‘troqlashmoqchiman.

Ish davomida har xil shartnomalarni ko‘rganman va ba’zilari meni hayron qoldirgan bo‘lsa, ba’zi shartnomalardagi moddalar o‘zim ko‘rmasam ishonmaydigan darajada g‘ayrioddiy tuyulgan. Masalan, o‘sha mashhur "Barselona" futbolchilari o‘zi oyoq tirnog‘ini olishi mumkin emasligi va bu ularning shartnomasida yozilgan bo‘lishi, oyoq tirnog‘ini faqat klubning yollangan vakillari olib qo‘yishi" haqida eshitgan bo‘lsangiz kerak.

Terma jamoamizda legioner o‘yinchilar ko‘payib boryapti, bu yaxshi. Ular o‘zlari bilan chet tajribalarini, chet malakalarini olib kelishadi, bu albatta chetga borganda erishiladigan “yaxshiroq o‘yinchi bo‘lish” degan asosiy yutuqqa qo‘shimcha bonus biz uchun.

Legionerlarimiz sababli bizga vitaminlar kirib keldi – esingizda bo‘lsa chet klublaridagi o‘yinchilarimizning tavsiyalari bilan vitaminizasiya kuchaygandi bizda bir necha yil avval, buni futbol ichida yurganlar yaxshi eslashadi.

Bugun bo‘ladigan o‘yin sun’iy maydonda o‘tadi va bunda men Fayzullayevning Moskva klubida o‘ynayotganidagi foydani sezyapman. Agar u takibda tushadigan bo‘lsa, SSKA stadionidagi sun’iy qoplama aralashmasiga o‘rganib ketgani bizga terma jamoamizda foyda bergan bo‘ladi, ko‘rasiz.

Lekin ikkinchi tomondan, sun’iy maydon biz kutmagan boshqa muammolarni keltirib chiqarishi mumkin – masalan Alijonov sun’iy maydonda o‘ynashiga ishonmayman, jarohati sababli o‘zini himoya qilib bugun maydonga tushmasa kerak. Kim biladi, balki yana boshqa o‘yinchilar ham qo‘shilar bunga o‘zlari xohlab yoki xohlamasdan. Agar Masharipovning yangi jamoasi bilan shartnomasida “sun’iy maydonda o‘ynash mumkin emas” deb yozilgan bo‘lsa kim buni o‘zgarta oladi, ayting-chi? Agar shunaqa sabab bilan u bugun o‘yinga tushmasa va bizga uning yordami yetmay, Xudo ko‘rsatmasin, ochko yo‘qotsak, kimni so‘kamiz. Sun’iy maydon tanlagan turkmanlarnimi, shu maydonni tasdiqlagan OFKnimi yoki Masharipovning shartnomasini tuzgan Grek klubi huquqshunosinimi?

Nima bo‘lganda ham qiziq o‘yin kutyapti bizni. Jamoamizga omad!

Ravshan Salimov.