O‘zbekiston Superligasi 26-turidan o‘rin olgan “Navbahor” – “Neftchi” jamoalari o‘rtasidagi uchrashuv arafasida “lochinlar”ning serbiyalik  31 yoshli tajribali yarim himoyachisi Yovan Jokich bo‘lajak o‘yin haqidagi fikrlari bilan o‘rtoqlashdi.

- Bo‘lajak o‘yin “vodiy derbisi” maqomiga ega. Bunday saviyadagi bahslar esa doimo shiddatli va keskin kurashlar ostida kechgan. Bo‘lajak bellashuvning ham shunday ruhda o‘tishi ehtimoli yuqori. Boisi, bu joriy mavsumning so‘nggi o‘yini hamda har bir jamoa oxirgi uchrashuvda ijobiy natijani qayd etishni xohlaydi.Bundan tashqari,bo‘lajak bahsdagi g‘alaba har ikki jamoa uchun juda muhim va sovrinli o‘rinlarni taqdim etadi.

Shuning uchun bo‘lsa kerak, mazkur o‘yinga xorijlik hakamlar tayinlandi.    

“Al-Hilol”ga qarshi kechgan bahsda muxlislarni ranjitib qo‘ydik. Shu bois, bo‘lajak o‘yinda g‘alaba qozonib, Cuperliganing joriy mavsumini muvaffaqiyatli tarzda yakunlab, milliy chempionatimizning bu yilgi so‘nggi o‘yinida muxlislarimizga quvonch ulashishga intilamiz va buni amalga oshirish  uchun barcha imkoniyatimizni ishga solamiz. Maydonga esa g‘alaba ishtiyoqida tushamiz.

Faqatgina ushbu bellashuvda ishqibozlardan jamoamizni bevosita stadionda munosib tarzda qo‘llab-quvvatlab, zafarimizni birgalikda nishonlashlarini so‘rab qolaman.

Bo‘lajak o‘yindagi g‘alaba “Navbahor”ning Superliga–2023dagi ajoyib xotimasi bo‘ladi.

Fursatdan foydalanib, xuddi o‘tgan yildagidek, joriy mavsumda ham  jamoamizga barcha sharoitlarni yaratib bergan Namangan viloyati hokimi Shavkatjon Shokirjanovich Abdurazzoqov va klub vise-prezidenti Otabek Arifovich Samatovlarga o‘z minnatdorchiligimni bildiraman. “Navbahor”ning zafarlarida ularning ham munosib hissalari bor.

So‘zim yakunida esa “Navbahor”ning yubiley – 1500-golini urib, klub tarixiga kirganligimdan xursandligimni izhor etmoqchiman", — dedi Jokich “Navbahor” matbuot xizmatiga bergan intervyusida.