O‘zbekiston futbol assosiasiyasida ayollar futboli bo‘yicha 2023 yil yakunlariga bag‘ishlangan yig‘ilish bo‘lib o‘tdi.

Tadbirni O‘FA birinchi vise-prezidenti Ravshan Ermatov ochib berib, ayollar futbolini yuqori darajaga ko‘tarish asosiy vazifalardan biri ekanini ta’kidladi.

«Mavsum davomida ayollar futbolini rivojlantirish yo‘lida qilgan mehnatingiz uchun barchangizga tashakkur bildirmoqchiman. So‘nggi yillarda futbolimiz har tomonlama o‘sdi va rivojlandi. Joriy yil Avstraliya va Yangi Zelandiyada o‘tkazilgan Jahon chempionatida O‘zbekiston futbol assosiasiyasi mutaxassislari malaka oshirishdi va tajriba almashib qaytishdi. Umuman ayollar futboli mavqei dunyo miqyosida ham yuqori darajaga chiqmoqda.

Vaqti kelib, O‘zbekiston ayollar terma jamoalari ham Jahon chempionatlarida yurtimiz sharafini munosib himoya qilishiga ishonamiz. 2023 yilda O‘zbekiston ayollar milliy terma jamoasi Parij Olimpiadasiga saralash bahslarining yakuniy bosqichiga yo‘l oldi. Jamoadagi har bir futbolchida vatanparvarlik va mas’uliyat hissi yuqori. 2024 yil mart oyida Toshkentda qizlar o‘rtasida U-20 Osiyo kubogi o‘tkaziladi. Mavsum so‘nggida ayollar futbolida birinchi marta VAR texnelogiyasidan foydalanildi. Shuningdek, 2024 yilda O‘FAning yangi futbol maydonida 4 ta yosh toifasida futbol kurslarini tashkil etishni rejalashtirganmiz.

Albatta kamchiliklar ustida ham tinimsiz ish olib boramiz. Ayollar futbolida bosqichma-bosqich hakamlar, murabbiylar va shifokorlar sonini ko‘paytirishimiz zarur», dedi Ravshan Ermatov. 

Yig‘ilish davomida ayollar futboli bo‘yicha 2023 yilda o‘tkazilgan turnirlar tahlili va 2024 yil uchun belgilangan vazifalar yuzasidan hisobotlar tinglandi. Ayollar futbolida mavjud muammolar va ularni bartaraf etish masalalari muhokama qilindi.