Bugun Saudiya Arabistoni mamlakatining Jidda shahrida FIFAning 2023-yilgi futbol sammiti bo‘lib o‘tdi. Unda tashkilotga a’zo mamlakatlar qatorida O‘FA birinchi vise-prezidenti Ravshan Irmatov boshchiligidagi O‘zbekiston vakillari ham ishtirok etdi.
Tadbirda FIFA prezidenti Janni Infantino va a’zo mamlakatlar vakillari tomonidan kelgusi yilda amalga oshirilishi ko‘zda tutilgan rejalar va dasturlar, akademiyalar va iste’dodlarni rivojlantirish sxemasi, hakamlik loyihalari, Ayollar o‘rtasidagi Jahon chempionati, FIFAning turli diskriminasiyalarga qarshi dasturi hamda musobaqalar borasidagi yangiliklar masalalari muhokama qilindi.
Sammitda 2023–2027-yillarga mo‘ljallangan strategik maqsadlarini aytib o‘tildi va FIFA dunyoni futbol orqali birlashtirish vazifasini yana bir bor e’tirof etdi.
“FIFA 211 ta assosiasiya, 211 davlatdan iborat ittifoq bo‘lib, ushbu mamlakatlarning har biri aynan bir xil majburiyatlarga ega va bu o‘zaro hurmatga asoslangan hamkorlikdir.
Agar bunday hurmatga erishsak, FIFA o‘z yo‘lida davom etadi, gullab-yashnaydi, kengayadi va dunyoni futbol orqali yaxshi tomonga o‘zgarishiga o‘z hissasini qo‘shishi mumkin”, dedi Janni Infantino.
